Reseıden Qazaqstanǵa 3-4 jolbarys jetkiziledi

ASTANA. KAZINFORM – Reseıden Qazaqstanǵa 3-4 jolbarys jetkiziledi. Bul týraly Ortalyq kommýnıkatsııalar qyzmetindegi brıfıngte Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń tóraǵasy Danııar Turǵambaev aıtty.

- 2024 jyly Turan jolbarysy men Prjevalskıı jylqysyn tarıhı mekeninde qalpyna keltirý boıynsha eki úlken joba júzege asyryla bastady. Jolbarystardy tarıhı mekenine qaıta jersindirý jónindegi baǵdarlamany iske asyrý aıasynda Іle-Balqash memlekettik tabıǵı rezervaty quryldy. Jolbarystyń tabıǵı azyq qoryn qaıta qalpyna keltirý úshin rezervattyń aýmaǵyna 205 bas toǵaı buǵysy ákelindi, 100-den astam qulandy qonys aýdarý jumystary júrgizildi, elikter men qabandar popýlıatsııasy kóbeıtildi. Ótken jyly kúzde Іle-Balqash rezervatyna arnaıy torly qorshaýda ósirý úshin Nıderlandydan 2 jolbarys ákelindi. Reseı Federatsııasynan 3-4 jolbarysty alyp kelý kútilýde, - dedi komıtet tóraǵasy.

Onyń atap ótýinshe, Prjevalskıı jylqysyn qaıta jersindirý jumystary jalǵasyp jatyr. 

«Buryn bul jylqylar elimizdiń 9 oblysyn meken etken. Prjevalskıı jylqysy álemdik jabaıy tabıǵattan 1960-jyldardyń sońyna qaraı joıylyp ketken bolatyn. Mınıstrliktiń halyqaralyq uıymdarmen yntymaqtastyǵynyń arqasynda Qostanaı oblysyndaǵy «Altyn Dala» rezervatyna Praga haıýanattar baǵynan 7 bas Prjevalskıı jylqysy ákelindi. Jalpy, 2029 jylǵa deıin 40 bas jylqy ákelý josparlanyp otyr, - dedi ol.

Aıta keteıik, elimizde Turan jolbarystarynyń alǵashqy jónshigi paıda bolýy múmkin.