Reseıdegi saılaý ýchaskesinde Qazaqstan Ánurany oryndalyp, ashyldy

MÁSKEÝ. QazAqparat – Reseıde Qazaqstan Elshiligi janyndaǵy №265 saılaý ýchaskesi jergilikti ýaqyt boıynsha saǵat 07.00-de ashyldy, dep habarlaıdy «QazAqparat» HAA menshikti tilshisi.

Saılaý komıssııasynyń músheleri barlyq qajetti jaǵdaılardyń, onyń ishinde sanıtarlyq talaptardyń qamtamasyz etilgendigin eskere otyryp, ýchaskeniń daýys berýge daıyndyǵyn kórsetti. Daýys berý Qazaqstannyń Memlekettik Ánuranyn oryndaýdan bastaldy. Daýys berýge birinshi ret qatysqan jastar óz tańdaýyn alǵashqylardyń biri bolyp jasady.

Ýchaske tóraǵasy Erkin Tuqymov habarlaǵandaı, Reseıdegi Qazaqstan azamattary máskeýlik ýchaskeden basqa Sankt-Peterbýrg, Qazan, Astrahan jáne Ombydaǵy QR bas konsýldyqtarynyń janynan qurylǵan 4 ýchaskede daýys bere alady.

Reseı Federatsııasyndaǵy ýchaskelerde daýys berý jergilikti ýaqyt boıynsha saǵat 07:00-den 20:00-ge deıin ótedi. Saılaý ýchaskesine kelgen kezde ózimen birge Qazaqstan Respýblıkasy azamatynyń tólqujaty nemese jeke kýáligi bolýy qajet.

Saılaý ýchaskesi jumysynyń basty máseleleriniń biri koronavırýsqa qarsy sharalar boldy.

Avtory Narymbek Ismaǵulov