Reseıdegi sý tasqyny: Qorǵan oblysynyń turǵyndary evakýatsııalanyp jatyr
ASTANA. KAZINFORM – Reseıdiń Qorǵan oblysynyń birqatar aýyldary men qala mańyndaǵy shaǵyn aýdandarda sý basý qaýpine baılanysty turǵyndardy evakýatsııalaý jarııalandy.
Tobyl ózenindegi sý deńgeıiniń kóterilýi jalǵasyp jatqan Qorǵan oblysynda jaǵdaı áli de kúrdeli. Aımaq bıliginiń málimetinshe, 15 sáýirdegi jaǵdaı boıynsha 12 782 adam evakýatsııalanǵan. Sý basý múmkin aımaqqa 7 mýnıtsıpaldyq aýdandaǵy 62 eldi meken, onyń ishinde Qorǵannyń ózi kirip otyr.
Qorǵan aýdanyndaǵy Tobyl ózeniniń deńgeıi 15 sáýirde túske qaraı «nólden keıingi» kórsetkishten 664 sm joǵary boldy, sý deńgeıi tórt saǵatta shamamen 44 sm-ge kóterildi. Iset jáne Mıass ózenderinde de sý deńgeıi kóterilip keledi.
Dúısenbide Qorǵan qalasy birqatar shaǵyn aýdandarynyń (Maloe Chaýsovo, Smolıno, Kamchıha stantsııasy), sondaı-aq Menşıkovo jáne Kropanka aýyldarynyń turǵyndaryn shuǵyl evakýatsııalanýǵa shaqyrdy, eskertý sırenalary jumys istep tur. Oblys ortalyǵyndaǵy taǵy 20 yqshamaýdan men júzden astam baý-baqsha seriktestigi Qorǵan qalasyndaǵy sý basý qaýpi bar aımaqtardyń qataryna kirdi.
«Qazirgi tańda Qorǵan qalasynda Tobyldaǵy sý deńgeıin 9 metrden 11 metrge deıin kórsetip turǵan Rogıdrometrdiń boljamyna súıene otyryp, mindetti túrde sý basqan jáne basatyn jerlerden ketý kerek», - dedi oblys ákimi.
Oblysta bógetterdi nyǵaıtý jumystary jalǵasyp otyr, qaýipti aımaqtarda kópqabatty kompozıttik materıaldan qurastyrmaly sý toltyrý bógetteri ornatylyp jatyr. Sonymen qatar, Tobyl alqabynda topyraqtyń sińirilýin arttyrý úshin tereń emes uńǵymalardy burǵylaý jumystary qolǵa alyndy.
Orynbor oblysynyń shyǵysynda jaǵdaı birtindep turaqtala bastasa, ońtústik aýmaq sýdyń kelýin kútip otyr. Orynbor oblysy basshylyǵy baspasóz qyzmetiniń habarlaýynsha, 15 sáýirdegi tańǵy jaǵdaı boıynsha oblysta 15 068 turǵyn úı men 23 643 sharýashylyq telimi sý astynda qaldy. 29 kópir qurylysy jabyq kúıinde qalyp otyr, 2 federaldyq tas joldyń 3 ýchaskesin sý tasý qaýpi bar. Zardap shekken aımaqtardan 16 547 adam, onyń ishinde 4 648 bala evakýatsııalandy.
Oblys gýbernatory Denıs Paslerdiń atap ótýinshe, demalys kúnderi Orynbor oblysynda sý birtindep azaıǵan. Dúısenbi kúni tańerteń sý deńgeıi úsh saǵattyń ishinde 5 sm-ge tómendedi. Alaıda, qazir úlken sý Jaıyq boıymen tómen qaraı, oblystyń ońtústik shekarasyna, onyń ishinde Qazaqstanmen shektesetin Elek aımaǵyna aǵyp jatyr.
«Orynborda sý kún saıyn azaıady degen boljam bar. Orsk qalasynda sý deńgeıiniń tómendeý dınamıkasy turaqty túrde jalǵasyp keledi. Úlken kólemdi sý ózennen tómen qaraı Elekke qaraı aǵyp jatyr, biz sol jerde tıisti jumystardy júrgizip jatyrmyz», - dedi D.Pasler.
Tomsk oblysynda sý tasqyny jaǵdaıy kúrdeli. Vershınıno, Batýrıno jáne Chernaıa Rechka eldi mekenderiniń bir bóligin sý basqan. Tom ózeninde muz keptelisi qaýpi úlken. Osyǵan baılanysty demalys kúnderi sý qoımasynda qosymsha muz jarý jumystary júrgizildi.
«Búginde jaǵdaıdy Kemerovo oblysynda sý deńgeıiniń tómendeýi jáne aýa temperatýrasynyń boljanǵan tómendeýi qıyndatyp otyr», - dedi Tomsk oblysynyń gýbernatory Vladımır Mazýr dúısenbi kúni ótken apparat otyrysynda.
Altaı ólkesinde barlyq aýdandarda tasqyn sý deńgeıi tómendedi. Aımaq basshylyǵynyń málimetinshe, keıbir joldar áli jabyq.
«Búginde oblysta bir mýnıtsıpalıtettegi 3 eldi mekende barlyǵy 23 turǵyn úı men 65 sharýashylyq telimi sý astynda qalyp otyr. Habar aýdanyndaǵy Habary aýylynda bir ýaqytsha ornalastyrý ortalyǵy jumysyn jalǵastyryp, sol jerde eki adam qalyp otyr», - dep habarlady oblys basshylyǵynyń baspasóz qyzmetinen.
Buǵan deıin habarlanǵandaı, Orynborda Jaıyq ózenindegi sý deńgeıi qaýipti deńgeıge jaqyndap, saǵat 8:00-de 897 sm-ge jetti. Sý basý qaýpi bar aımaqta júrgen adamdardyń barlyǵy dereý evakýatsııalanýǵa shaqyryldy.
