Reseıde jańa elektr stantsııalary salynady
MÁSKEÝ. KAZINFORM — Jańa energetıkalyq nysandardy salý úshin Reseıdiń ońtústik óńirleri, sondaı-aq Máskeý men Máskeý oblysynyń aýmaǵy qarastyrylyp otyr, dep jazdy Kazinform agenttiginiń menshikti tilshisi.
Reseı Federatsııasy Úkimetiniń baspasóz qyzmeti habarlaǵandaı, jalpy qýaty 3,2 myń MVt bolatyn 15 jańa generatsııalyq nysan salý josparlanǵan.
RF Úkimeti tóraǵasynyń orynbasary Aleksandr Novaktyń jetekshiligimen ótken elektr energetıkasyn damytý jónindegi úkimettik komıssııa otyrysynda 2030 jylǵa deıingi kezeńde elektr energııasyna artyp kele jatqan suranysty qamtamasyz etý máseleleri talqylandy.
Boljam boıynsha, bolashaqtaǵy suranysty óteý úshin ótkizý qabileti 1,5 myń MVt-qa deıin jetetin turaqty toktaǵy energııa kópirin salý jáne 1 myń MVt-tan astam jańa generatsııalyq qýat kózderin iske qosý kózdelip otyr.
Sondaı-aq, energııaǵa degen qajettilik aldaǵy jyldary tek arta túsetini, sonyń ishinde sandyq tehnologııalardyń damýynyń áserinen bolatyndyǵy atap ótildi.
Buǵan deıin habarlanǵandaı, 2025 jyldyń qańtarynda Reseıdiń qatysýymen Qazaqstanda úsh jańa jylý elektr ortalyǵy (JEO) — Kókshetaý, Semeı jáne Óskemen qalalarynda salynýy tıis edi. Alaıda keıin bul jobalardy Qazaqstan óz kúshimen júzege asyratyny belgili boldy. Qazirgi ýaqytta Kókshetaýdaǵy JEO qurylysy belsendi kezeńge ótti.
«Samuryq-Energo» AQ basqarma tóraǵasy Qaırat Maqsutov Úkimettegi brıfıng barysynda Semeı men Óskemendegi JEO qurylysyna qatysty daıyndyq jumystary júrgizilip jatqanyn aıtty. Oǵan qarjylandyrý kózderin uıymdastyrý da kiredi.
Onyń aıtýynsha, túrli nusqalar qarastyrylýda — menshikti qarjy kózderi de, úkimetaralyq kelisimder aıasynda usynylǵan reseılik qarjylandyrý da. Qazir Reseı tarapymen sońǵy sharttar pysyqtalyp jatyr, al qarjylandyrý kózi jóninde áli túpkilikti sheshim qabyldanǵan joq.
Qarjylandyrý aıqyndalǵannan keıin merdigerlerdi tańdaý jumysy júrgiziledi. Jobalardy júzege asyrýǵa reseılik kompanııalarmen qatar halyqaralyq konsortsıýmdar da qatysýy múmkin.
Premer-mınıstr Oljas Bektenov Úkimet otyrysynan keıin ótip jatqan baspasóz máslıhatynda Óskemen, Semeı, Kókshetaý qalalarynda salynýǵa tıis úsh jylý-elektr ortalyǵynyń taǵdyry ne bolatynyn aıtqan edi.