Reseıde TikTok buǵattalýy múmkin

ASTANA. KAZINFORM – Áleýmettik jeliler men messendjerlerdi kásibı qoldanýshylar qaýymdastyǵy Roskomnadzorǵa Reseıde TikTok-ty buǵattaýdy qarastyrýdy usyndy. Sarapshylar pikirinshe, reseılik áleýmettik jeliler osynyń arqasynda aýdıtorııasyn arttyrady. Retteýshi ótinishti qabyldap, ony 8 mamyrǵa deıin qarastyrady, dep habarlaıdy TASS aqparat agenttigi. 

TikTok qosymshasy qazir Reseıde jumys istep jatyr, biraq tek eki jyl burynǵy beınerolıkter qoljetimdi. Qaýymdastyqtyń eske salǵanyndaı, blogerler sol arqyly qaralymnan túsken tabystan aıyryldy.

«Shyn máninde, bul platformanyń búginde Reseıde jasaıtynynyń bári paıdalanýshylardy TikTok-ty almastyrǵan otandyq platformalardan alystatady», - dep sanaıdy qaýymdastyq. 

Qaýymdastyq mamandarynyń qysqa beınerolıkter qyzmetin paıdalanýshylar arasynda júrgizgen saýalnamaǵa sáıkes, olardyń 70% TikTok qaraýdy jalǵastyrýda: keıbireýleri ony ádetinshe paıdalansa, basqalary beıneniń qansha eskirgenine mán bermeıdi.

Qaýymdastyq TikTok-ty paıdalanýshy derekteriniń shektelýin tekserýdi suraıdy («Jeke derekter týraly» zań), óıtkeni áleýmettik jeli áli de beınelerdi kórýge jáne olardyń astyna pikirler qaldyrýǵa múmkindik berip otyr. 

Qaýymdastyqtyń atap ótýinshe, platforma 2019 jyly derekterdi lokalızatsııalaýǵa daıyn ekenin bildirgennen keıin zańnyń oryndalýy týraly qoǵamdyq habarlamalar bolmaǵan. Sarapshylar, sonymen qatar, áleýmettik jelide usynys algorıtmderi týraly zańǵa sáıkestik belgilerin taba almady. 

Eger zań buzýshylyqtar anyqtalsa, qaýymdastyq Roskomnadzordan «eń qatań jazalaý sharasy» – Reseı aýmaǵynda buǵattaýdy qoldaný múmkindigin qarastyrýdy suraıdy.