Reseıde sheteldikter baılanyssyz qalýy múmkin

MÁSKEÝ.KAZINFORM — 1 shildeden bastap Reseıde bıometrııalyq derekterin tapsyrmaǵan shetel azamattarynyń uıaly baılanysy óshirile bastaıdy, dep habarlaıdy Kazinform agenttiginiń tilshisi. 

Bul týraly Reseıdiń Tsıfrlyq damý, baılanys jáne buqaralyq kommýnıkatsııalar mınıstrligi málimdedi.

Habarlamada aıtylǵandaı, bıyldan bastap sheteldik azamattar baılanys operatorlarymen kelisimshartty tek Birińǵaı bıometrııalyq júıege (BBJ) tirkelgen jaǵdaıda ǵana jasaı alady. Olarǵa óz atyna 10 sım-kartaǵa deıin rásimdeýge ruqsat etilgen.

Buryn jasalǵan kelisimsharttar boıynsha bıometrııany tapsyrý merzimi 2025 jyldyń 1 shildesinde aıaqtalady. Osy kúnge deıin talapty oryndamaǵandar úshin baılanys operatorlary kezeń-kezeńimen uıaly baılanysty óshire bastaıdy.

Mınıstrliktiń málimetinshe, búginde 2 mln-nan astam sheteldik BBJ-ge tirkelip, jańa erejeler boıynsha kelisimshart jasaǵan.

Sonymen qatar, 3 aıdan astam ýaqyt boıy paıdalanylmaǵan nómirler birden óshiriledi. Al belsendi nómirler boıynsha baılanys birtindep shekteledi: aldymen halyqaralyq jáne qalaaralyq qońyraýlar buǵattalady, ınternet jyldamdyǵy tómendeıdi, al 30 kúnnen keıin baılanys qyzmetteri tolyq toqtatylady. Osy merzim ishinde kelisimshartty jańa erejeler boıynsha qaıta rásimdeýge bolady.

Budan bólek, 30 maýsymnan bastap Reseıge kelýdi josparlap otyrǵan sheteldikter ruID qosymshasy arqyly elge kirý týraly ótinim berip, onda bıometrııalyq derekterin tirkeı alady. Shekarada tsıfrlyq profıl qurylady, onda Jeke shottyń saqtandyrý nómiri jáne Memlekettik qyzmetterdegi (Reseıdegi egov balamasy) tirkeýlik jazbasy kórsetilý kerek. Profıl men bıometrııany rastaý úshin bankke bir ret barý jetkilikti. Qaıtadan sýretke túsip, daýys jazýdyń qajeti joq.

Eske sala keteıik, bıyl 1 qańtardan bastap sheteldikterge sım-karta satyp alý tártibine qosymsha talaptar engizildi. Baılanys kelisimshartyn jasaý úshin sheteldik azamat Jeke shottyń saqtandyrý nómirin alyp, Memlekettik qyzmetter portalynda tirkelýi tıis, sondaı-aq bıometrııany tirkep, óz telefonynyń IMEI kodyn kórsetýi qajet.

Aıta ketelik elimizde sım-kartalardy satyp alý kezinde bıometrııalyq sáıkestendirý júıesi engizilip jatqany týraly jazǵan edik.