Reseıde Roblox oıyn platformasy buǵattaldy

ASTANA. KAZINFORM — Reseıde Roblox onlaın-oıyn platformasy resmı túrde buǵattaldy. Reseıdiń baılanys jáne aqparat salasyn baqylaý qyzmeti bul sheshimdi servıs arqyly ekstremıstik materıaldardyń taralýy jáne LGBT-ıdeıalardyń nasıhattalýymen túsindirdi, dep habarlaıdy Deutsche Welle.

Vedomstvonyń málimdemesine sáıkes, balalar arasynda tanymal platformada terrorıstik áreketterdi beıneleý, mektepke shabýyl jasaý, qumar oıyndarǵa qatysý sııaqty kontent kezdesken.

Sonymen qatar, vedomstvo Roblox-ta balalarǵa qatysty «jynystyq sıpattaǵy áreketter, ıntım foto talap etý, azǵyndyqqa ıtermeleý jáne zorlyq kórsetý qaýpi bar» ekenin atap ótti.

Platformanyń pedofılder arasynda da tanymal ekeni aıtyldy.

3 jeltoqsanda Reseıde paıdalanýshylar Roblox-tyń qoljetimsizdigi týraly jappaı shaǵymdana bastaǵan. Shaǵymdardyń jartysyna jýyǵy mobıldi qosymshaǵa, qalǵany veb-nusqaǵa qatysty bolǵan.

Qarasha aıynyń sońynda vedomstvo Roblox-ty buǵattaý múmkindigin eskertken edi. Qyzmet «balalardyń rýhanı-adamgershilik damýyna zııan keltirýi múmkin orynsyz kontent» týraly habarlap, platformadan materıaldardy óshirýdi birneshe ret talap etken.

 Reseıdiń baılanys jáne aqparat salasyn baqylaý uıymynyń málimetinshe, 2019 jyldan beri Roblox ákimshiligine tyıym salynǵan materıaldardy joıý týraly kóptegen resmı talaptar joldanǵan. Monıtorıng nátıjeleri ishki moderatsııa júıesi platformany tolyq qaýipsiz ete almaıtynyn kórsetken.

Roblox 2024 jyldyń qańtarynda jáne shildesinde Reseı tarapynyń talabymen birneshe jobany joıǵan. Sonyń ishinde aǵylshyn tilindegi «LGBT» abbrevıatýrasy bar server ataýlary jáne LGBT-tulǵalary men atrıbýttary kezdesetin materıaldar óshirilgen.

Aıta keteıik, Apple Úndistannan Reseıge iPhone satylsa, aıyppul salatynyn eskertti.