Reseıde koronavırýstyń jańa nusqasy tarap jatyr

ASTANA. KAZINFORM — Reseıdiń Tutynýshylar quqyqtaryn qorǵaý jáne adam densaýlyǵyn qadaǵalaý federaldy qyzmetiniń (Rospotrebnadzor) basshysy Anna Popova elde Stratus dep atalatyn SARS-CoV-2 jańa XFG shtammynyń taralyp jatqanyn aıtty. Bul týraly ol TASS agenttigine bergen suhbatynda aıtty. 

Popovanyń aıtýynsha, jańa shtamm óte juqpaly, biraq aýrý ádette jeńil túrde ótedi.

— Jańa jaǵdaılar kún saıyn artyp keledi. Aldymen 300, keıin 384 jaǵdaı tirkeldi. Bul kórsetkish odan da joǵary bolady, — dedi Popova.

Ol koronavırýstyń árbir jańa nusqasynyń ómir súrýi men damýy úshin ózindik erekshelikteri bar ekenin atap ótti. Sondyqtan ınfektsııanyń saldary ártúrli bolýy múmkin, aldyn alý sharalaryn saqtaý jáne densaýlyqqa muqııat bolý mańyzdy.

Rospotrebnadzordyń málimetinshe, shilde aıynyń sońyna deıin Reseıde Stratus shtammyn juqtyrýdyń 114 jaǵdaıy tirkelgen. Onyń 54 paıyzy Máskeýde bolsa, qalǵany Máskeý oblysy, Magadan, Sverdlovsk, Lenıngrad oblystarynda anyqtalǵan.

Reseıde Stratus tyń alǵashqy jaǵdaıy 24 sáýirde tirkeldi, al álemdegi alǵashqy jaǵdaı Kanadada 2025 jyldyń 27 qańtarynda anyqtaldy.

Eske sala keteıik, Aq úı koronavırýs indetiniń «shynaıy shyǵý tegi» týraly veb-paraqsha ashty.