Reseıde QQS mólsherlemesin 22%-ǵa deıin kóterý máselesi qaralýda

MÁSKEÝ.KAZINFORM - RF Qarjy mınıstrligi el úkimetiniń qaraýyna Salyq kodeksine jekelegen ózgerister engizýdi kózdeıtin zań jobasyn usyndy. Atap aıtqanda, qosymsha qun salyǵy (QQS) mólsherlemesin 20%-dan 22%-ǵa deıin kóterý usynylady, dep habarlaıdy agenttik tilshisi vedomstvonyń saıtyna silteme jasap.

Usynylǵan zań jobalary paketi 2025 jylǵy bıýdjet týraly zańǵa túzetýlerdi, 2026 jylǵa jáne 2027-2028 jyldarǵa arnalǵan federaldyq bıýdjet jónindegi zań jobasyn, sondaı-aq Bıýdjet jáne Salyq kodeksterine jekelegen ózgerister engizý týraly zań jobalaryn qamtıdy.

Habarlamada QQS ósiminen túsetin qarajat eń aldymen qorǵanys pen qaýipsizdikti qarjylandyrýǵa baǵyttalatyny aıtylǵan.

Sonymen qatar áleýmettik mańyzy bar barlyq taýarlar úshin (azyq-túlik, dári-dármek pen medıtsınalyq ónimder, balalarǵa arnalǵan taýarlar jáne basqalary) QQS-tyń jeńildetilgen 10% mólsherlemesi saqtalatyny kórsetilgen.

Zań jobasy qabyldanǵan jaǵdaıda, Salyq kodeksine engiziletin túzetýler 2026 jylǵy 1 qańtardan bastap kúshine enedi.

Qarjy sarapshylarynyń baǵalaýynsha, QQS mólsherlemesin kóterý bastamasy Reseı bıýdjetine jyl saıyn qosymsha 1 trln rýbl ákelmek.

Aıta keteıik, EO Reseıdiń «Mır» tólem júıesine qarsy jańa sanktsııalar daıyndap jatyr.