Reseıde apatqa ushyraǵan Qazaqstan avtobýsynda Ózbekstan azamattary zardap shekti

ASTANA. KAZINFORM – Reseı aýmaǵynda «Shymkent-Nıjnıı Novgorod» baǵytyndaǵy apatqa ushyraǵan avtobýsta Qazaqstan azamattary anyqtalmady. Bul týraly Syrtqy ister mınıstrliginiń resmı ókili Aıbek Smadııarov aıtty.

«Búgin bizdiń konsýlmen telefon arqyly baılanysqa shyqtym. Qazir osy apat boıynsha málimetterdi naqtylap jatyr. Aldyn ala aqparat boıynsha Ózbekstan azamattary zardap shekken. ıAǵnı bizdiń azamattar joq. Taǵy da qosymsha aqparat bolsa, jarııalaımyz», - dedi A. Smadııarov vedomstvodaǵy aptalyq baspasóz máslıhatynda.

Budan buryn habarlanǵandaı, Reseı Federatsııasynyń Samara oblysynda Qazaqstannan barǵan avtobýs apatqa ushyrady. Oqıǵa ornynda 2 jolaýshy qaza tapty, 10 jolaýshy medıtsınalyq mekemege jetkizilgen.

Bul avtobýstyń Qazaqstanda tirkelgeni anyqtaldy. Ol Ózbekstan azamattaryn tasymaldap júrgen.