Reseı men Ýkraınanyń IT mamandary atyraýlyqtarǵa balabaqshadan oryn alýǵa "kómektesken"
Oblys ákiminiń orynbasary Jasulan Bısembıevtiń aıtýynsha, Atyraý qalasyndaǵy «Juldyz» jáne «Kóktem» shaǵyn aýdandarynyń turǵyndary qalalyq bilim bólimi qyzmetkerleriniń ústinen shaǵym túsirgen. Turǵyndar bólim qyzmetkerleriniń is-áreketin tekserýdi suraǵan. Óıtkeni, atalǵan shaǵyn aýdandardaǵy balabaqshadan oryn alý úshin INDIGO avtomattandyrylǵan qyzmeti arqyly aqsha talap etilgen.
«Biz shaǵyn aýdandar turǵyndarynyń shaǵymynda aıtylǵan derekterge tekserý júrgizdik. INDIGO platformasynyń mamandarymen kezdestik. Nátıjesinde, qalalyq bilim bóliminiń qyzmetkerleri tarapynan sybaılas jemqorlyq áreketteri joq ekeni anyqtaldy. Alaıda, balabaqshadan oryn alýǵa Reseı men Ýkraınanyń IT mamandarynyń qatysy bar bolyp shyqty. Olar áleýmettik jelidegi paraqshalarda balabaqshaǵa joldama alý úshin qyzmet qunyn belgilegen. Balasyn mektepke deıingi mekemege ornalastyrǵysy kelgen ata-ana «kómekshige» óziniń ETsQ-kiltin beredi. Al, sheteldik «kómekshi» mektepke deıingi mekemeden oryn brondaıdy. Ol bul «qyzmeti» úshin 30-40 myń teńge alady. Mundaı brondy ata-analardyń ózderi tegin jasaı alady. Platformada arnaıy nusqaýlyq bar. Qalalyq bilim berý bóliminen keńes berilýi múmkin», - dedi Jasulan Bısembıev.
Eske sala ketelik, budan buryn Atyraýda 160 oryndyq jańa balabaqsha ashylǵanyn habarlaǵan bolatynbyz.
Keıin munaıly shaharda taǵy bir 160 oryndyq jańa balabaqsha paıdalanýǵa berildi.
