Reseı men Ýkraınany jaǵdaıdy qalpyna keltirý úshin baıypty dıalog bastaýǵa shaqyramyz – QR SІM

ASTANA. QazAqparat – Qazaqstan Reseı men Ýkraınany jaǵdaıdy qalpyna keltirý úshin baıypty dıalogqa shaqyrady. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Qazirgi álem halyqaralyq jaǵdaıdyń kúrdeli shıelenisýiniń qaýipti kezeńin bastan keshýde, onda túıindi jahandyq máselelerdi sheshýdiń qarama-qaıshylyqty tásilderi men sanktsııalyq qysym ádisteri aldyńǵy qatarǵa shyqty. Memlekettik shekaralardy qaıta formattaý júrip jatyr, aýmaqtyq daýlar shıelenisip, buryn «muzdatylǵan» qaqtyǵystar qaıtadan qyza túsýde», - dedi ol mınıstrliktiń osy jylǵy jumysyn qorytyndylaýǵa arnalǵan baspasóz máslıhatynda.

Onyń atap ótýinshe, Ýkraına daǵdarysy Reseı men Batys arasyndaǵy geosaıası shıelenistiń jańa kezeńine ákelgen eń úlken synaq bolyp tur.

«Bir kezderi jaqyn, baýyrlas elder arasyndaǵy áskerı qaqtyǵys osy halyqtardyń barlyq dostaryn qatty alańdatady jáne ókinishin týdyrady. Biz dástúrli túrde qarsylas taraptardy jaǵdaıdy qalpyna keltirý úshin baıypty dıalog bastaýǵa shaqyramyz», - dedi Aıbek Smadııarov.

Osyǵan deıin Qazaqstan RF elshisi Borodavkınniń daýly suhbatyna qatysty túsinikteme alǵany týraly jazdyq.

Foto: gov.kz