Reseı men Ýkraına bitimgershilikke qatysty túsinikteme berdi
ASTANA. KAZINFORM - Er-Rııadtaǵy úsh kúndik kelissózden keıin Aq úı Qara teńizdegi Reseı men Ýkraına arasynda bitimgershilik týraly jarııalady, dep habarlaıdy euronews.
AQSh-tyń málimdeýinshe, Ýkraına men Reseı Qara teńizdegi atysty toqtatý týraly usynysty qoldaıdy.
Seısenbide jarııalanǵan eki málimdemede Aq úı Kıev pen Máskeý «qaýipsiz tasymaldaýdy qamtamasyz etýge, kúsh qoldanýdy boldyrmaýǵa jáne kommertsııalyq kemelerdi Qara teńizde áskerı maqsatta paıdalanýǵa jol bermeýge kelisti» dep habarlady.
Bul kelisimge Saýd Arabııasynyń astanasy Er-Rııadtaǵy AQSh pen eki qarsylas arasyndaǵy úsh kúndik kelissózden keıin qol jetkizildi.
Alaıda Kremldiń málimdemesinde keme qatynasy qaýipsizdigi týraly keıbir shekteýler alynyp tastalǵannan keıin ǵana kelissóz kúshine enetini kórsetilgen. Sharttardyń ishinde azyq-túlikpen (onyń ishinde balyq ónimderimen) jáne tyńaıtqyshtarmen halyqaralyq saýda operatsııalaryn qamtamasyz etýge tartylǵan Rosselhozbank pen ózge de qarjy uıymdarynan sanktsııalardy alyp tastaý, olardy SWIFT-ke qosý, qajetti korrespondenttik shottar ashý, azyq-túlik pen tyńaıtqyshtardy óndirýshi jáne eksporttaýshy kompanııalardan sanktsııalardy alyp tastaý, porttarda qyzmet kórsetýge shekteýler men sanktsııalardy alyp tastaý, sondaı-aq Reseıge aýylsharýashylyq tehnıkasyn jáne azyq-túlik pen tyńaıtqyshtar óndirisine qatysatyn basqa taýarlardy jetkizýge shekteýlerdi alyp tastaý týraly aıtylǵan.
Ýkraına Qorǵanys mınıstri Rústem Ýmerov Qara teńizde kemelerdiń qaýipsiz qozǵalysy týraly máselege nazar aýdardy.
– Reseı áskerı kemeleriniń Qara teńizdiń shyǵys bóliginen tys jerlerge qozǵalysy osy kelisimderdiń retin buzý, Qara teńizde erkin júzýdi qamtamasyz etý jónindegi mindettemelerdi buzý jáne Ýkraınanyń ulttyq qaýipsizdigine qater tóndirý retinde qarastyrylady. Bul jaǵdaıda Ýkraınanyń ózin-ózi qorǵaýǵa tolyq quqyǵy bolady, - dep jazdy Ýmerov.
Ýkraına prezıdenti Aq úı jarııalaǵan málimdemege túsinikteme berip, keıbir málimetterdi atap ótti. Zelenskııdiń aıtýynsha, erkin keme qatynasy týraly tarmaq múmkindiginshe keńirek túsindirilýi kerek.
– Teńizde beıbitshilik pen erkin keme qatynasy týraly aıtatyn bolsaq, ınfraqurylym týraly da aıtyp otyrmyz. Onyń qalaı júzege asatynyn kóreıik, - dedi ol.
Buǵan qosa, ol Ýkraına AQSh-qa shabýyldardan qorǵalýy tıis nysandar tizimin bergenin rastady.
Ýkraına prezıdenti Reseı men Ýkraınanyń ár tarapqa mańyzdy bir tarmaǵy bar ekenine nazar aýdardy. Ýkraına áskerı tutqyndardy bosatý týraly, al Reseı keıbir sanktsııalardy alyp tastaý týraly ótinish jasaǵan.
Seısenbi kúni Saýd Arabııasynyń astanasy Er-Rııadta Ýkraına men AQSh delegatsııalary arasyndaǵy kelissózderdiń jańa raýndy aıaqtalǵanyn jazǵan bolatynbyz.