Reseı men Ýkraına alty aıdan beri alǵash ret tutqyn almasty
Reseı men Ýkraına sońǵy alty aıda alǵash ret tutqyn almasty. Máskeýden habarlaǵandaı, Ýkraınadaǵy áskerı is-áreketke qatysqan 248 reseılik elge oraldy. Al Kıev 230 adam, onyń ishinde alty beıbit turǵynnyń elge oralǵanyn rastady. Kazinform bul týraly Euronews-ke silteme jasap habarlaıdy.
Ýkraına derekkózderiniń habarlaýynsha, bosatylǵandar arasynda Marıýpol, «Azovstal» jáne «Zmeınyı» araldarynyń qorǵaýshylary bar.
Joǵarǵy Radanyń Adam quqyqtary jónindegi ýákili Dmıtrıı Lýbınetstiń naqtylaýynsha, bul taraptar arasyndaǵy 49-shy almasý boldy.
Áskerı tutqyndardy úılestirý shtabynyń málimetinshe, bul «qaıtarylǵan qorǵaýshylar sany boıynsha eń úlken almasý».
Operatsııanyń BAÁ deldaldyǵymen júrgizilgeni habarlandy.
Kıevtiń resmı málimetine sáıkes, 2023 jyldyń aıaǵynda Reseı tutqynynda 4337 adam bolǵan, onyń 763-i — beıbit turǵyndar.
Máskeý byltyr kúzde Ýkraına tutqynynda 500 reseılik bar ekenin málimdegen.
