Reseı men AQSh ókilderi aldaǵy demalys kúnderi Maıamıde kezdesýi múmkin
ASTANA. KAZINFORM — Reseı men AQSh ókilderi aldaǵy demalys kúnderi Maıamıde kezdesýi múmkin. Bul týraly Deutsche Welle habarlady.
Politico basylymynyń málimetinshe, taraptar Ýkraınadaǵy qaqtyǵysty toqtatýǵa baǵyttalǵan yqtımal qadamdardy talqylaýdy josparlap otyr.
Reseı tarapynan kezdesýge Reseıdiń Tikeleı ınvestıtsııalar qorynyń basshysy Kırıll Dmıtrıev qatysýy múmkin. Al AQSh atynan Donald Tramptyń arnaıy ókili Stıv Ýıtkoff pen prezıdenttiń keńesshisi Djared Kýshnerdiń kelýi kútilip otyr. Derekkózderdiń habarlaýynsha, kezdesýdi daıyndaýǵa qatysty baılanystar birneshe aptadan beri júrgizilip keledi.
Atalǵan is-sharaǵa qatysty Aq úı tarapynan ázirge resmı túsinikteme berilgen joq.
Eske sala ketsek, buǵan deıin Ýkraına prezıdenti Vladımır Zelenskıı Maıamıde jańa amerıkalyq-ýkraınalyq kelissózder ótetinin málimdegen edi.
Al Eýropa kóshbasshylary Ýkraına úshin «kópultty kúsh» qurýǵa ýáde berdi.