Reseı Qazaqstannyń iri jeti ınvestorynyń qatarynda - QR Syrtqy ister mınıstri

MÁSKEÝ. QazAqparat - Reseı Qazaqstannyń iri ınvestorlarynyń «jetiligine» kirip otyr. Qazaqstan men Reseıdiń jalpy somasy 2,7 mlrd dollardy quraıtyn birlesken 16 ınvestıtsııalyq joba bar. Reseı SІM basshysy Sergeı Lavrovpen kezdesken QR Syrtqy ister mınıstri Beıbit Atamqulov osylaı málim etti.

«Reseı Federatsııasy Qazaqstanmen syrtqy saýda aınalymynda 19 paıyzdy alyp otyr. 2018 jyldyń qorytyndylary boıynsha bizde ózara tıimdi saýdanyń ósimi baıqalǵan. Qańtar-qarasha aılaryndaǵy aınalym 15,7 mlrd AQSh dollaryn quraǵan. Bul 2017 jyldyń osyndaı kezeńimen salystyrǵanda 6 paıyzǵa kóp», - dedi B.Atamqulov.

«Reseı Federatsııasy Qazaqstan ekonomıkasynyń iri jeti ınvestorynyń qatarynda. Qazirgi kezde Qazaqstan men Reseıdiń jalpy somasy 2,7 mlrd AQSh dollardy quraıtyn birlesken 16 ınvestıtsııalyq jobasy bar. Bul túrli salalar - taý-metallýrgııa jáne hımııa ónerkásibi, agroónerkásip kesheni jáne mashına qurylysyndaǵy jobalar», - dep atap ótti ol.

Avtor: Medet Ahmetov