Reseı Qazaqstanǵa Amýr jolbarystaryn tegin beredi

ASTANA. QazAqparat – Turan jolbarysynyń popýlıatsııasyn qalpyna keltirý aıasynda «Іle-Balqash» qoryǵy daıyndaldy. Bul týraly QR Ekologııa, geologııa jáne tabıǵı resýrstar mınıstri Serikqalı Brekeshev aıtty, dep habarlaıdy QazAqparat tilshisi.

«Turan jolbarysy boıynsha jumystar jalǵasyp jatyr. «Іle-Balqash» qoryǵy daıyndaldy. Biz bul qoryqtyń 415 myń gektardan astam aýmaǵyn belgiledi. Jolbarystarǵa qatysty aıtatyn bolsaq, qyrkúıek aıynda Reseı Federatsııasynda ótken ekonomıkalyq forýmynda RF-tiń Tabıǵat mınıstrligimen arada memorandýmǵa qol qoıyldy. Qazirgi ýaqytta tıisti jol kartasy ázirlenip jatyr. Oǵan sáıkes biz ǵylymı zertteýlerden basqa, 2025 jyly amýr jolbarysynyń birinshi partııasyn elimizge ákelýdi josparlap otyrmyz», - dedi S. Brekeshev Májilistegi Úkimet saǵatynan keıin tilshiler saýalyna jaýap bere otyryp.

Osy oraıda ol Qazaqstanǵa úsh jolbarys jetkiziletinin aıtty. Bul turǵyda ol atalǵan qoryq aýmaǵynda qaban men elik sanyn kóbeıtý, buqar buǵylarynyń popýlıatsııasyn qalpyna keltirý jumystary júrip jatyr.

«Jolbarystardy Reseı jaǵy tegin beredi, sondyqtan bul turǵyda tólem týraly másele joq. Amýr jáne Turan jolbarystaryna toqtalsaq, ǵalymdarymyz DNQ boıynsha bul jolbarystar ózara jaqyn ekenin dáleldedi. Sondyqtan Amýr jolbarystaryn Іle-Balqash qoryǵynyń aýmaǵyna qaıta jersindirý týraly sheshim qabyldandy», - dedi mınıstr.

Aıta keteıik, 2010 jyly Qazaqstan halyqaralyq jolbarys sammıtinde Ortalyq Azııaǵa Turan jolbarystaryn qaıtarýǵa daıyn ekenin málimdegen.

Al 2017 jyly Qazaqstan men Búkilálemdik jabaıy tabıǵat qory (WWF) Ońtústik Balqash mańy men Іleniń Delta aýdanynda jolbarystyń reınstrodýktsııasy Baǵdarlamasyn júzege asyrý týraly Memorandýmǵa qol qoıyldy.

Foto: autogear.ru