Referendýmǵa jastar belsendi qatysyp jatqanyn kórdik – Chjan Lın

ASTANA. KAZINFORM – Azııadaǵy ózara is-qımyl jáne senim sharalary jónindegi keńestiń (AÓSShK) Baıqaýshylar mıssııasy Astanada referendým ótip jatqan 6 ýchaskege bardy. Delegatsııa azamattardyń daýys berýge belsendi qatysyp jatqanyn aıtýda.

«Biz bul baqylaý oryndaryn daýys berý pýnktteriniń tiziminen tys, derbes tańdadyq. Olarǵa barýǵa eshqandaı kedergi bolǵan joq. Oǵan qosa, azamattardyń daýys berýge belsendi qatysýyn jáne qyzmetkerlerdi, komıssııa qatysýshylaryn daıarlaýdyń kásibı deńgeıin atap ótkimiz keledi. Biz daýys beretin azamattardyń, ásirese jastardyń óte belsendi qatysqanyn kórdik. Kóptegen jastar otbasylarymen, balalarymen birge daýys berýge keldi. Ýchaskelik komıssııanyń músheleri daýys berý úshin qajetti jaǵdaılardy qamtamasyz etti, týyndaǵan máseleler boıynsha tolyq túsiniktemeler berdi», - dedi AÓSShK Bas hatshysynyń orynbasary Chjan Lın Astanada Halyqaralyq baıqaýshylarǵa qolǵabys kórsetý ortalyǵynda ótken brıfıngte.

Sonymen birge, Chjan Lın ózderi aralaǵan ýchaskelerde barlyq qajetti aqparat usynylǵanyn, múmkindigi shekteýli adamdar úshin qajetti jaǵdaılar jasalǵanyn atap ótti.

«Biz bolǵan 6 ýchaskede daýys berý belgilengen tártippen jáne jergilikti, halyqaralyq baıqaýshylardyń, sondaı-aq BAQ ókilderiniń qatysýymen tynysh ótti. Bizge daýys berýshilerden eshqandaı shaǵym-eskertý túsken joq», - dep tolyqtyrdy Chjan Lın.

Eske salaıyq, búgin qazaqstandyqtar atom elektr stantsııasyn salý máselesi boıynsha jalpyulttyq referendýmda daýys berip jatyr.

Respýblıkalyq referendým bıýlleteninde bir ǵana saýal bolady:
— Siz Qazaqstanda atom elektr stantsııasyn salýǵa kelisesiz be?
Daýys berýshi jaýaptyń eki nusqasynyń birin tańdaıdy:
— «Iá, kelisemin» nemese, «Joq, kelispeımin».

Aıta keteıik, saǵat 16:00-degi jaǵdaı boıynsha 7 062 358 azamat bıýlleten aldy. Bul tizimge engizilgen azamattardyń 57,68 paıyzyn quraıdy.