Referendýmdy baıqaý úshin 256 uıym akkredıtteldi

ASTANA. KAZINFORM — Barlyq deńgeıdegi referendým komıssııalary respýblıkalyq referendýmdy ótkizýge daıyndyq jumystaryn aıaqtady. Bul týraly Ortalyq referendým komıssııasynyń otyrysynda komıssııa tóraǵasy Nurlan Ábdirov aıtty. 

— Barlyq deńgeıdegi referendým komıssııasy daıyndyq jumystaryn aıaqtady. Qajetti uıymdastyrýshylyq is-sharalar júrgizildi, komıssııalardyń qyzmetine ádistemelik qoldaý qamtamasyz etildi, daýys berý rásimderin qoldaný men referendým týraly zań talaptaryn saqtaýda biryńǵaı tásil qalyptastyryldy. Bul bizdiń respýblıkalyq referendýmdy ótkizýge jáne ony zań talaptaryna qatań sáıkes uıymdastyrýǵa tolyq daıyn ekenimizdi aıtýǵa múmkindik beredi, — dedi Nurlan Ábdirov.

Onyń aıtýynsha, daıyndyqtyń negizgi baǵyttarynyń biri komıssııa múshelerin oqytý boldy. Kúntizbelik josparǵa sáıkes, 13 naýryzda oqytýdyń qorytyndy kezeńi aıaqtaldy. Jedel aqparatqa sáıkes daıyndyq barysynda 5 800-den astam oqytý semınary ótkizilip, oǵan ártúrli deńgeıdegi komıssııalardyń 71 myńnan astam múshesi qatysty. Daıyndyq deńgeıin qosymsha baǵalaý maqsatynda qashyqtan onlaın-testileý uıymdastyryldy.

Referendýmǵa daıyndyq aıasynda zańnamada kózdelgen baıqaý júrgizýge qajetti jaǵdaılar qamtamasyz etildi. Referendým ýchaskelerinde bolýǵa quqyǵy bar ókilderi qatysa alatyn qoǵamdyq birlestikter men kommertsııalyq emes uıymdardy akkredıtteý júrgizildi. Búgingi tańda 256 uıym akkredıtteldi, onyń ishinde 11-in Ortalyq referendým komıssııasy, al 245-in aýmaqtyq komıssııalar akkredıttedi.

Aıta keteıik, 15 naýryzda «Referendým — 2026» onlaın marafony ótedi.