Referendým kúni Atyraýda 33 náreste ómirge keldi
Oblystyq densaýlyq saqtaý basqarmasy basshysynyń orynbasary Qaısar Abdalıevtyń aıtýynsha, búgin, 5 maýsym – referendým kúninde jaryq dúnıege esigin 33 sábı keldi. Onyń ishinde 15 ul, 18 qyz bar.
«Búgin oblystyq perınataldyq ortalyqta 33 sábı dúnıe esigin ashty. Jańa týǵan shaqalaqtyń 15-i ul, 18-i qyz. Sábıler men jańa bosanǵan analar ózderin jaqsy sezinedi. Qazir 2 ana bosandyrý zalynda», -dedi Qaısar Abdalıev.
Búgin Atyraý qalalyq perzenthanasynda jergilikti ýaqytpen saǵat 7:00-ge deıin 5 sábı dúnıege kelgen edi. Jas bosanǵan Gaýhar Buzaýbekova úshinshi sábıin 9 jyldan soń bosanǵan. Al, Kámshat Qaıratova osy perzanthanada tuńǵyshyn bosanǵan.
«Men búgin dárigerlerdiń kómegimen tuńǵyshymdy dúnıege ákeldim. Dál búgin, elimizde otandastarym tarıhı tańdaýyn jasaıtyn eń eleýli kúni ómirge kelgen tuńǵyshymnyń bolashaǵy jarqyn bolaryna senemin», -deıdi Kámshat Qaıratova.
Jas bosanǵan ananyń ekeýi de perzenthanadaǵy referendým ýchaskesinde alǵashqylardyń qatarynda daýys berdi. Referendým komıssııasy Gaýhar Buzaýbekovaǵa sábı kútimine arnalǵan jıyntyqty syıǵa tartty.
Eske sala ketelik, budan buryn Atyraý perzenthanasynda jas bosanǵan analar daýys bergenin jazǵan edik.
