Reddit Ulybrıtanııada derekterdi zańsyz paıdalanǵany úshin 20 mln dollar tóleıdi
ASTANA. KAZINFORM — Ulybrıtanııanyń derekterdi qorǵaý salasyndaǵy retteýshisi (Information Commissioner's Office) Reddit kompanııasyna kámeletke tolmaǵandardyń jeke málimetterin zańsyz óńdep, balalar derekterin qorǵaý talaptaryn buzǵany úshin 14,47 mıllıon fýnt sterlıng (shamamen 19,5 mıllıon dollar) kóleminde aıyppul saldy, dep habarlaıdy Xinhua agenttigi.
Tekserý barysynda platformada jasty senimdi túrde tekseretin júıe bolmaǵany anyqtaldy. Sonyń saldarynan 13 jasqa tolmaǵan balalardyń derekterin óńdeýge zańdy negiz bolmaǵan. Sonymen qatar kompanııa ótken jyldyń qańtaryna deıin jeke derekterdi qorǵaýǵa qatysty mindetti táýekelderdi baǵalaý rásimin júrgizbegen.
Retteýshiniń qorytyndysyna sáıkes, bul zańbuzýshylyqtar kámeletke tolmaǵandardyń derekterin zańsyz óńdeýge ákelip, olardyń zııandy kontentke qol jetkizý qaýpin arttyrǵan. Ulybrıtanııanyń aqparat máseleleri jónindegi komıssary John Edwards kompanııanyń qupııalylyq saıasatyn «qolaısyz» dep atap, Reddit-ti balalar derekterin qorǵaý jáne paıdalanýshylardyń tıisti kelisimin qamtamasyz etý mindettemelerin elemegeni úshin synǵa aldy.
Bul sheshim Ulybrıtanııada balalardyń áleýmettik jelilerdi paıdalanýyna qatysty shekteýlerdi kúsheıtý máselesi talqylanyp jatqan kezeńde qabyldandy. Álem boıynsha úkimetter psıhıkalyq densaýlyqqa tónetin qaýipterdi, kıberbýllıngti jáne zııandy kontentke qoljetimdilikti jas shekteýlerin engizý men yqtımal tyıymdardyń negizi retinde jıi atalyp keledi.
Eske sala keteıik, balalar quqyǵyn qorǵaý baǵytynda ótken jyly Astanada 11 981 is tirkelgen.