«Real Madrıd» Ortalyq stadıonda jattyǵý ótkizdi
ALMATY. KAZINFORM – ÝEFA reıtınginde kósh bastap turǵan «Real Madrıd» klýbynyń oıynshylary Almatynyń Ortalyq stadıonynda jattyǵý jasady.
Fýtbolshylar aldymen alańdy birneshe aınala júgirip ótip, odan keıin qyzdyryný jáne sozylý jattyǵýlaryna kiristi. Keıin «Real Madrıd» oıynshylary úsh topqa bólinip, doppen jumys istedi.
Jattyǵý aldynda ótken baspasóz máslıhatynda ıspanııalyq klýb oıynshysy Federıko Valverde Almaty men jankúıerler jaıly alǵashqy áserimen bólisti.
- Qazaqstanda osynshama «Real Madrıd» jankúıerin kórgenime qýanyshtymyn. Árıne, biz úshin mundaı qoldaý úırenshikti jaǵdaı. Biraq túngi ýaqytta áýejaıda kóptegen adamdardyń qarsy alýy – qýantarlyq jaıt. Fýtboldaǵy eń jaǵymdy sát – Ispanııadan osynshalyqty alys elde de qoldaý tabamyz, – dedi Valverde.
ÝEFA Chempıondar lıgasynyń toptyq kezeńi aıasynda «Qaırat» pen «Real Madrıd» arasyndaǵy oıyn 30 qyrkúıek kúni saǵat 21:45-te Ortalyq stadıonda ótedi.
Eske salaıyq, buǵan deıin «Real Madrıd» fýtbol klýbynyń bas bapkeri Habı Alonso «Qaıratqa» qarsy ótetin oıynǵa qatysty pikir bildirdi.