«Real Madrıd» klýby rekordtyq kólemde tabys tapty

ASTANA. KAZINFORM — Eýropa fýtbolyndaǵy eń turaqty jáne tabysty klýbtardyń biri sanalatyn ataqty «Real Madrıd» 2024/25 qarjylyq maýsymynyń resmı esebin usyndy, dep habarlaıdy realmadrid.com.

Klýb jarııalaǵan sandar, árıne, jankúıerler men sarapshylardy bir qaraǵanda tań qaldyrady. Óıtkeni bul esep arqyly «koroldik klýb» sportta ǵana emes, qarjy salasynda da qanshalyqty bıikke jetkenin taǵy bir ret pash etti.

«Real Madrıd» klýby 2024/25 maýsymda eshqandaı transfersiz, ıaǵnı oıynshylardy satýdan kiris almaı-aq 1 mıllıard 185 mıllıon eýro paıda tapty. Bul ótken jylǵy kórsetkishten shamamen 10%-ǵa artyq jáne klýb tarıhyndaǵy absolıýtti rekord retinde tirkeldi.

Osyndaı joǵary tabystyń aıasynda «Realdyń» taza paıdasy da aıtarlyqtaı ósimge qol jetkizdi — 24,3 mıllıon eýro. Bul kórsetkish ótken maýsymmen salystyrǵanda 56 paıyzǵa artyp, klýbtyń ekonomıkalyq qyzmetiniń qanshalyqty tıimdi ekenin kórsetedi.

Taǵy bir nazar aýdararlyq kórsetkish - EBITDA. Bul paıyzdardy, salyqtardy jáne amortızatsııany esepke almaǵandaǵy paıda somasy. «Real Madrıd» úshin bul kórsetkish 242,9 mıllıon eýro boldy. Bul da tarıhı rekord jáne klýbtyń qarjylyq tetikterin qanshalyqty sátti ornatqanyn rastaıdy.

Qazirgi ýaqytta klýbtyń jalpy taza kapıtaly 598 mıllıon eýroǵa jetti. Qaryzdyń menshikti kapıtalǵa qatynasy 0-ge teń, bul «Real Madrıd» klýby tolyǵymen derlik qaryzsyz degendi bildiredi.

Sonymen qatar klýbtyń stadıonyn — «Santıago Bernabeýdi» qalpyna keltirýge alynǵan nesıelerdi eseptemegende, «Real Madrıd» klýbynyń taza qaryzy nebári 12 mıllıon eýrony quraıdy. Mundaı turaqtylyq kóptegen klýbtar úshin arman bolyp qala beredi.

«Real Madrıd» tek syrt alańda ǵana emes, qarjylyq josparda da chempıondyqqa umtylyp jatqan sııaqty. Oıynshylar, jankúıerler jáne ınvestorlar úshin mundaı turaqtylyq erteńgi kúnge senim men shabyt beredi.

Eske sala keteıik, Maıkl Djordan eń kóp tabys tapqan sportshy atanǵany jaıly jazǵan edik.