Rámizder kúnine oraı Pavlodar oblysynda velosherý ótti
PAVLODAR. KAZINFORM - Memlekettik rámizder kúnine oraı Pavlodardyń Maı aýdanynda merekelik velosherý uıymdastyryldy. Sporttyq is-sharada salamatty ómir saltyn ustanatyn 85 áýesqoı ózara myqtyny anyqtady.
Veloshabandozdar dodasy áýeli Kóktóbe aýyldyq ákimdigi ornalasqan ǵımarat aldynan bastaldy. Velosherýdiń ashylý saltanatynda aýdan basshysy Aǵybaı Ámirın jurtshylyqty Rámizder kúnimen quttyqtap, sportshylarǵa sáttilik tiledi.
- Memlekettik nyshandarymyz – bul kez kelgen memlekettiń egemendigi men birtutastyǵyn beıneleıtin, onyń ajyramaıtyn atrıbýttarynyń biri. Óskeleń urpaqty salamatty ómir saltyna nasıhattaý, patrıottyq sezimdi oıatý, Memlekettik rámizderimizdi qurmetteý maqsatynda búgin osyndaı sporttyq is-shara ótkizýdi uıǵardyq. Bıyl Maı aýdanynyń qurylǵanyna 85 jyl tolyp otyr. Osy mereıli datany eskere otyryp, velosherýge 85 sportshy qatyssa degen tilek bolǵan. Shaqyrtýymyzdy eskerip, belsendi qatysyp jatqan barsha turǵyndar men oqýshylarǵa, jastarǵa alǵys aıtamyz,- dedi quttyqtaý sózinde ákim.
Velosherýge oqýshylar men jastar, memlekettik qyzmetshiler, turǵyndar men ardagerler, kásipkerler qatysty. Velosıpedke otyryp alyp, onymen jeldeı esýdiń densaýlyq úshin paıdasy mol ekenin Maı aýdanynyń jurtshylyǵy jaqsy túsinedi. Úlken shaharda turmasa da, jergilikti halyq arasynda velosıpedpen qydyrystaý, kúndelikti jumysyna baryp-kelý búginde keń taralǵan. Densaýlyqqa paıdasynan bólek, shap-shaǵyn ári yńǵaıly bul kóliktiń qorshaǵan ortaǵa da esh zııany joq ekenin eske sala ketken artyq bolmas. Al Maı óńiri – kezinde atom synaǵynan eń kóp zardap shekken aımaqtardyń biri.
Aýdandyq balalar-jasóspirimder sport mektebiniń dırektory Saǵadat Otarov mundaı is-shara jas urpaqty dene tárbıesimen aınalysýǵa úndeýde mańyzdy rol atqaratynyn atap ótti.
«Jazǵy ýaqytta taza aýada serýendep, sportpen shuǵyldanýdyń paıdaly ekeni barshaǵa málim. Al velosıped tebýdiń paıdasy ushan-teńiz. Velosport kúndelikti ádetińizge aınalsa, jalpy densaýlyqqa jaǵymdy áseri mol. Velosıpedti ekologııalyq kólik retinde de nasıhattap júrmiz. Biraq eń bastysy onyń adam aǵzasyna qosymsha ottegi bólip, este saqtaý men oılaý qabiletine jaqsy áser etetinin umytpaýymyz kerek», - deıdi sport mamany.
Qatysýshylar Áıteke bı, Abaı, Seıfýllın, Abylaı han kóshelerin basyp ótip, Ortalyq alańda máre syzyǵyn qıdy.
Uıymdastyrýshy tarap – aýdan ákimdiginiń qyzmetkerleri qatysýshylar arasynan «Eń jas velosherýshi» men «Ardager velosherýshini» anyqtap, olarǵa arnaıy nomınatsııalardy tabystady. Al úzdik shyqqandar men júldeli orynǵa ıe bolǵandar baǵaly syılyqtarmen marapattaldy.
