Rámizderdi qadirleı bilemiz be

NUR-SULTAN. QazAqparat - 4 maýsym – Qazaqstan Respýblıkasynyń memlekettik rámizderi kúni. Álemniń keıbir memleketterinde rámizder kúni retinde arnaıy kún atalyp ótetin bolsa, keıbirinde arnaıy memlekettik mereke retinde toılanady. Al keıbir elder bul kúndi arnaýly data retinde qarastyrmaıdy.Qazaqstan memlekettik rámizderge, onyń statýsyna, qoldanylý tártibine aıryqsha den qoıǵan elder qatarynda. Olaı bolsa búgingi maqalamyzda memlekettik rámizderdi paıdalaný, onyń memleket pen ony mekendeýshi halyq ómirindegi ornyna qatysty álemdik tájirıbelerdi jáne elimizde táýelsizdik jyldary osy salada qabyldanǵan zańnamalyq ózgerister jáne onyń qazaqstandyq patrıotızmdi qalyptastyrý jolynda atqarar róline qysqasha toqtalatyn bolamyz, dep jazady Strategy2050.kz.

2007 jylǵy 4 maýsymda qabyldanǵan «Qazaqstan Respýblıkasynyń memlekettik rámizderi týraly» N 258 Konstıtýtsııalyq zańyna súıensek memlekettik rámizderge Memlekettik Tý, Memlekettik Eltańba, sondaı-aq Memlekettik Gımn jatady. Qazaqstanda Memlekettik rámizderdi daıyndaý, taratý jáne ony paıdalaný qoldanystaǵy normatıvtik-quqyqtyq aktilerde belgilengen talaptarǵa sáıkes kelýi tıis.

Ár dáýirde túrli memleketterdiń, ulttardyń ózine jaqyn tartqan jáne qadirlegen sımvoldary, ápsanalar men tarıhı oqıǵalarǵa negizdelgen erekshe belgileri bolǵany tarıhtan belgili. Ejelgi zamandarda bul sımvolıkalardyń keıbiri halyqtyń dinı tanym-túsinigine, qalyptasqan ómir sharttaryna, tabıǵı erekshelikterge sáıkes paıda bolyp, san ǵasyrlar boıy adamdarmen birge jasaý arqyly búginge deıin jalǵasyp keldi.

Álemniń kóptegen memleketterinde memlekettik rámizder, eldiń jalaýlary, qaster tutatyn sımvoldyq belgilerdiń tarıhı astary, dinı jáne patrıottyq sezimge negizdelgen mazmunǵa ıe. Máselen, eýropalyq jáne kóptegen batys memleketteriniń baıraq-jalaýlarynda hrıstıan dininiń, evreılerde ıýdaızmniń, musylman memleketteriniń kópshiliginde jasyl tústiń, aıdyń belgisi nemese ıslam dinine qatysty ózge de atrıbýttardyń nyshany aıqyn seziledi. Sondaı-aq, álemde memleketterden bólek, kóptegen jeke eldi mekenderdiń, qalalardyń da derbes rámizderi bar ekenin de aıta ketýge bolady. Buǵan qarap, sımvolızm, rámiz mazmunynda eldiń, eldi mekenniń, sol jerdi mekendegen halyqtyń jyldar boıy qalyptasqan tarıhı sanasy, ómirlik prıntsıpteri, qundylyqtary ról oınaıtynyn baıqaýǵa bolady.

Buǵan sheteldik jalaýlardy eseptemegende keshegi Kóktúrikter, Altyn Orda, Qazaq handyǵy jáne Alash partııasynyń derbes baıraqtarynyń bolǵany jáne qasterli sımvol retinde mańyzdy is-sharalarda, soǵystar men kelissózder kezinde keńinen qoldanylǵany belgili. Tipti, qazaq halqynda ár rýdyń ózine tán jeke belgileri men baıraqtarynyń bolǵany tarıhı derekterden belgili. Qazaq rýlarynyń belgileri men sımvoldary Tańbaly Tas eskertkishterinde tasqa qashalyp, búginge deıin jetip otyr. Al búgingi táýelsiz Qazaqstanda da eldiń sımvolyna, azamattardyń maqtanyshyna aınalǵan memlekettik rámizder de bar.

Qazaqstan táýelsizdik alǵannan keıin ekonomıka, saıasat, ıdeologııa jáne áleýmettik salalarda damýdyń jańa baǵytyn tańdady. Osy rette, memlekettiń jańa rámizderin tańdaý da ýaqyt talap etken jańa ózgeris bolatyn.

Keńes Odaǵy ydyraıtyn, táýelsizdik alatyn jyldar taıaǵan ýaqytta belgili tarıhshy, akademık, QazaqKSR halyq depýtaty Manash Qozybaev Prezıdent Nursultan Nazarbaevqa Qazaqstannyń zaman talabyna saı jańa gerbi men ánuranyn daıyndaý qajettigi jóninde arnaıy hat jazyp, burynǵy sımvolıkanyń jeke basqa tabynýshylyq beleń alǵan, eski ıdeologııa zamanynda jazylǵanyn, sol úshin jańa mátinde ulttyq boıaý, táýelsizdik elementterin engizý qajettigi týraly usynystaryn alǵa tartqan bolatyn. Bul elimizdiń jańa rámizderin daıyndaý jónindegi jumystarǵa serpin bergenin aıta ketken jón.