Ramazan Sárpekov: Konstıtýtsııa - memlekettik jáne áleýmettik basty qundylyq
«Ózderińiz bilesizder, 25 jyl buryn qazaqstandyqtar elimizdiń negizgi Zańyn jalpyhalyqtyq referendým arqyly qabyldady. QR Tuńǵysh Prezıdenti - Elbasy Nursultan Nazarbaev atap ótkendeı, ol qazaqstandyq jetistiktiń basty faktory boldy. Osy kezeńde Konstıtýtsııa egemendi Qazaqstan damýynyń strategııalyq baǵyttaryn aıqyndaıtyn mańyzdy saıası-quqyqtyq qujat qana emes, sonymen qatar qazaqstandyq azamattyq pen patrıotızmdi qalyptastyrýǵa negiz bolǵan basty memlekettik jáne áleýmettik qundylyq boldy», - deıdi Ramazan Sárpekov.
Spıker Konstıtýtsııa bizdiń elimizde beıbitshilikti, kelisimdi qamtamasyz etýdiń, memlekettik bılik pen basqarýdyń búkil júıesin nyǵaıtýdyń, ekonomıkany edáýir reformalaýdyń, teńdestirilgen syrtqy jáne ishki saıasatty júrgizýdiń, demokratııalyq ınstıtýttardy damytýdyń jáne áleýmettik modernızatsııanyń senimdi negizine aınalǵanyn aıtty.
«Konstıtýtsııany ázirleý men qabyldaýdyń bastaýlarynda QR Tuńǵysh Prezıdenti - Elbasy Nursultan Ábishuly Nazarbaev tur. Nursultan Ábishulynyń Konstıtýtsııa mátinin jasaý men talqylaýǵa jeke baqylaý jasaǵany sózsiz. Ol egjeı-tegjeıine deıin tereń boılap, jobanyń ár baby men ár jolyn muqııat zerttep, óte mańyzdy túzetýler men tolyqtyrýlar engizdi. Sondyqtan óziniń mereıtoıyna oraı Konstıtýtsııalyq Keńes «QR Tuńǵysh Prezıdentiniń Qazaqstan Respýblıkasynyń konstıtýtsııalyq qurylysyndaǵy róli. Elbasynyń sabaqtary» atty kitap shyǵaryp, osy jyly 1 shildede Tuńǵysh Prezıdent qory kitaptyń tusaýyn kesti», - deıdi Ramazan Sárpekov.
Eske sala ketsek, elordada «Qazaqstan Respýblıkasynyń Konstıtýtsııasy - qoǵam men memleketti áleýmettik jańǵyrtýdyń irgeli negizi» taqyrybyndaǵy halyqaralyq ǵylymı-praktıkalyq onlaın konferentsııa bastaldy.
Konferentsııaǵa Parlament depýtattary, QR Konstıtýtsııalyq Keńesiniń músheleri, memlekettik organdardyń basshylary men ókilderi, Qazaqstannyń ǵylymı qoǵamdastyǵy jáne Germanııa, Reseı, Belarýs jáne Qyrǵyzstannan kelgen halyqaralyq sarapshylar qatysýda. Konferentsııany Qazaqstan Respýblıkasy Konstıtýtsııalyq Keńesiniń qoldaýymen Zańnama jáne quqyqtyq aqparat ınstıtýty negizinde Ádilet mınıstrligi uıymdastyrdy.