Ramazan aıy: Astanalyqtarǵa úndeý jasaldy

NUR-SULTAN. QazAqparat –Nur-Sultan qalasynyń bas memlekettik sanıtarlyq dárigeri Sarhat Beısenova Ramazan aıynda aýyzashardy tek otbasy ortasynda ótkizýge shaqyrdy, dep habarlaıdy QazAqparat tilshisi.

«Qurmetti elorda turǵyndarymen qonaqtary! Bizdiń qoǵam úshin mańyzdy dinı mereke – qasıetti Ramazan aıy jaqyndap keledi. Bul elimizdiń kóptegen azamattary úshin úlken mańyzǵa ıe. Qalanyń barlyq azamattaryn mereke kúnderi túsinistikpen qarap, karantın rejımin qatań saqtaýdy suraımyz. Biz dindar adamdardyń rýhanı jáne dinı sezimderine tereń qurmetpen qaraımyz. Alaıda, qaýipti vırýstyń aýyr pandemııasy barlyǵynyń densaýlyǵyna qaýip tóndiredi», - dedi ol elorda ákimdiginde ótken baspasóz máslıhaty barysynda.

Sarhat Beısenova osyǵan baılanysty Nur-Sultan qalasynyń sanıtarlyq-epıdemıologııalyq baqylaý departamenti shekteý sıpatyndaǵy barlyq is-sharany eskerýdi jáne saqtaýdy, atap aıtqanda, ujymdyq is-sharalardy, onyń ishinde úı jaǵdaıynda ótkizbeýdi usynatyndyǵyn basa aıtty.

«Sonymen qatar qonaqasy nemese birge ýaqyt ótkizý úshin kelgisi keletin otbasy músheleri men dostaryna da kelýge jol bermeý kerek. 65 jastan asqan adamdar táýekel tobynda qalady. Osyǵan baılanysty qasıetti Ramazan aıynda aýyzashardy tek otbasy ortasynda ótkizýdi usynamyz. Pandemııa kezinde áleýmettik araqashyqtyq saqtaý óte mańyzdy ekenin umytpańyzdar. Sondyqtan biz barlyq usynystardy oryndaýǵa jáne pandemııa men kúreste jaýapkershilik pen birlikti kórsetýge shaqyramyz», - dedi elordanyń bas sanıtar dárigeri.