QazVac qazaqstandyq vaktsınasy neden jasalǵan?

NUR-SULTAN. QazAqparat - QazVac (QazCovid-in) – bul ınaktıvtendirilgen, tazartylǵan jáne kontsentratsııalanǵan vaktsına. Onyń quramyna alıýmınıı gıdrototyǵy – adıývant qosylǵan, dep habarlaıdy QR Bilim jáne ǵylym mınıstrliginiń baspasóz qyzmeti.

Otandyq vaktsınany ázirleý barysynda jyldar boıy qoldanylǵan tehnologııa paıdalanyldy. Onyń barlyq komponenti senimdi, óıtkeni olar basqa vaktsınalardy ázirleý kezinde aprobatsııadan (synaqtan) ótken.

Inaktıvtendirilgen vaktsınany ázirleý platformasy belgili jáne qaýipsiz bolyp tabylady. Onyń quramyndaǵy komponentter azamattar buryn alǵan vaktsınalardyń quramynda bolǵan. Vaktsınaǵa qosylǵan bir ǵana jańa komponent – ınaktıvtendirilgen vırýs.

Inaktıvtendirilgen vaktsına dástúrli jáne tıimdi bolyp sanalady, ony daıyndaý tehnologııasy kúrdeli emes jáne vaktsınalardyń basqa túrlerine qaraǵanda qaýipsiz. Sondyqtan qazaqstandyq ǵalymdar ınaktıvtendirilgen vaktsına jasaý týraly sheshim qabyldady.