QazaqGaz ulttyq kompanııasyn reformalaý kerek – senator
Osy oraıda ol Premer-Mınıstr Álıhan Smaıylovtyń atyna joldaǵan depýtattyq saýalynda elimizdiń gaz salasyndaǵy problemalar jáne olardy sheshý joldary týraly aıtyp berdi. Depýtat gaz tasymaly júıesiniń tozýy men elimizdegi gazben qamtamasyz etý kórsetkishiniń tómendigi jáne gaz baǵasyn qalyptastyrýdyń ashyqtyǵyna alańdaýshylyq bildirdi. Senator osyǵan baılanysty salany basqarý júıesin ózgertýdi, atap aıtqanda «QazaqGaz» ulttyq kompanııasyn reformalaýdy usyndy.
Senator resýrs bazasyn tolyqtyrý úshin jer qoınaýyn paıdalanýshylardy jańa gaz jobasyn iske asyrýǵa yntalandyrý sharalaryn ázirleýdi usyndy. Gazǵa baǵa belgileý protsesiniń ashyqtyǵy men óńirlerdi gazdandyrý jónindegi búgingi kúnniń ahýalyna sáıkes keletin jańa jospar qurý da mańyzdy.
«Saryarqa» magıstraldyq gaz qubyry qurylysynyń baıaý júrip jatqanyn ekenin eskere kelgende, buryn josparlanǵandaı 2025 jylǵa qaraı soltústik óńirlerdi gazdandyrýdy aıaqtaý múmkin bolmaıtyny anyq. Búgingi tańda gazdyń bolmaýy ınvestıtsııa tartý, jańa óndiris ashý, halyqty jumyspen qamtý jáne jalpy el ekonomıkasy men óńirlerdi damytý úshin basty tejeýshi faktorlardyń biri bolyp tabylady. Sondyqtan, qazirgi jaǵdaıdy eskere otyryp, óńirlerdi gazdandyrýda ekonomıkalyq jáne ulttyq qaýipsizdikti qamtamasyz etetin eń qolaıly nusqany qarastyrý usynylady», - dedi depýtat Sultanov.
Senator osyǵan baılanysty Mınıstrler Kabınetiniń basshysyna gaz salasyn damytýdyń 2030 jylǵa deıingi keshendi josparyn bekitýdi jedeldetýdi usyndy jáne onda osy máselelerdiń bári kórinis tabýy tıis ekeni aıtyldy.
