QazaqGaz Almaty qalasy JEO syrtqy gaz ınfraqurylymynyń qurylysyn aıaqtady
ASTANA. KAZINFORM - 24 qyrkúıekte «Almaty-Baıserke-Talǵar» magıstraldy gaz qubyry ekinshi tarmaǵynyń qurylysy aıaqtaldy. Іs-sharaǵa «Samuryq-Qazyna» AQ UÁQ basqarma tóraǵasy Nurlan Jaqypov, Almaty oblysy ákiminiń orynbasary Rýstam Isataev, Almaty qalasy Alataý aýdany ákimi Talǵat Malybaev jáne «QazaqGaz» UK» AQ Basqarma tóraǵasy Sanjar Jarkeshov qatysty.
Bul JEO arnalǵan gaz ınfraqurylymynyń tórtinshi nysany. Onyń uzyndyǵy - 62,4 km, dıametri – 530mm, ótkizý qabileti – saǵatyna 1 000 000 m3.
«Búgingi kúni barlyq jumystar aıaqtaldy. Obektiniń mańy jaılastyryldy. Gaz qubyrynyń jumysy tekserildi. Magıstraldy gaz qubyrynyń ekinshi tarmaǵy tutynýshylardy jáne JEO-2, JEO-3 nysandaryn tabıǵı gazben turaqty túrde qamtamasyz etýge yqpal etedi», – dedi Nurlan Jaqypov.
Sonymen qatar, gaz tasymaldaý júıesin keńeıtý qoldanystaǵy Almaty-Baıserke-Talǵar bir jelilik gaz qubyrynyń toqtap qalýyna baılanysty tótenshe jaǵdaılardy boldyrmaýǵa múmkindik beredi.
«Memleket basshysynyń Almaty qalasynyń Jylý elektr ortalyqtaryn gazdandyrý týraly tapsyrmasy aıasynda QazaqGaz ulttyq kompanııasy “Almaty-Baıserke-Talǵar” MGQ ekinshi tarmaǵynyń qurylysyn aıaqtady. Bizdiń enshiles kompanııamyz “Intergaz Ortalyq Azııa” barlyq jumysty belgilengen kesteden erte aıaqtady. Osy oraıda, jobanyń sátti júzege asýyna qoldaý bildirgen Samuryq-Qazyna qory, Almaty qalasy, Almaty oblysynyń ákimdigine erekshe alǵysymdy bildiremin», - dedi Sanjar Jarkeshov.
Syrtqy gaz ınfraqurylymyn daıyndaý tórt aýqymdy nysannyń qurylysyn qamtydy. Olar - JEO-2 jáne JEO-3 eki avtomatty gaz taratý stantsııasy, olardyń ónimdiligi saǵatyna 250 jáne 150 myń tekshe metr, Almaty-Baıserke-Talǵar jáne Qazaqstan-Qytaı gaz qubyrlary arasyndaǵy ónimdiligi saǵatyna 1 mln tekshe metrdi quraıtyn TIP-04 gaz qubyry jalǵastyrǵyshy, sondaı-aq Almaty-Baıserke-Talǵar magıstraldyq gaz qubyrynyń ekinshi jelisi. 2023 jyldyń qarasha aıynda eki avtomatty gaz taratý stantsııasy men TIP-04 gaz qubyry merziminen buryn paıdalanýǵa berildi.
Aıta keteıik, Almaty jylý elektr stansalaryn gazǵa kóshirý qalanyń ekologııalyq ahýalynyń jaqsarýyna yqpal etedi. Sonymen qatar, Almaty men Almaty oblysynyń gaz tasymaldaý júıesin keńeıtý, kásipkerlik pen ónerkásiptik kásiporyndardyń damýyna jańa serpin beredi. Tıisinshe, jańa jumys oryndary ashylyp, óńir ekonomıkasyna mýltıplıkatıvtik áser etedi.
