Qazaq Banki salymshylaryna tólem jasaý merzimi uzartyldy

ALMATY. QazAqparat – «Qazaq Banki» AQ salymshylaryna 2020 jyldyń 24 maýsymyna deıin kepildi ótemaqy tólenetin boldy. Bul týraly QazAqparat tilshisi Qazaqstannyń depozıtterge kepildik berý qoryna silteme jasap habarlaıdy.

Qazaq Banki salymshylarynyń basym kópshiligi ótemdi alýǵa ótinish bildirmegendikten, agent-banki arqyly tólem merzimi 2020 jyldyń 24 maýsymyna deıin uzartyldy.

«Ótken 12 aıda VTB Banki (Qazaqstan) Qazaq Banki salymshylaryna QDKBQ atynan jáne qarajaty esebinen 20,3 mlrd teńge somasyna ótem tóledi, bul mindettemeler jalpy somasynyń 99%-yn qurady. Búgingi kúni kepildik berilgen ótemdi alýǵa júginbegen Qazaq Banki salymshylary aldyndaǵy mindettemelerdiń qaldyǵy 228,0 mln teńgeni quraıdy. Búgingi kúnge deıin, ótemaqyny 5 871 salymshy aldy, bul bank salymshylary jalpy sanynyń 33%-yn quraıdy» , - deıdi Qordyń baspasóz qyzmeti.

Bank salymshylarynyń kóbi shottardaǵy qarajattyń azdyǵyna baılanysty ótemdi alýǵa júginbegen, biraq mundaı múmkindik týraly bilmegen adamdar da bar. Sondyqtan QDKBQ VTB Banki (Qazaqstan) kelisimniń qoldanys merzimin taǵy da jarty jylǵa uzartý týraly sheshim qabyldady.

«Qazaq Banki» AQ 2018 jyly barlyq banktik operatsııalardy júrgizý lıtsenzııasynan aıyryldy. 2018 jyly 24 qazanda Almaty qalasynyń mamandandyrylǵan aýdanaralyq ekonomıkalyq soty «Qazaq Banki» AQ-ny májbúrlep taratý týraly sheshim qabyldady. Sheshim 2018 jyly 12 jeltoqsanda kúshine endi. Sondaı-aq, jumysyn toqtatqan «Qazaq Banki»-niń klıenti 13 mln teńgesin áli alyp ketpegen.