Qaisar áskerı-patrıottyq jobasy iske qosyldy

ALMATY. QazAqparat - Óńirlik kommýnıkatsııalar qyzmetiniń alańynda Almaty qalasy «Jastar rýhy» jastar qanatynyń tóraǵasy Ákejan Keńesov partııalyq jobalar týraly aıtty, dep habarlaıdy QazAqparat tilshisi.

Spıkerdiń sózinshe, bıyl alǵash ret «Qaisar» áskerı-patrıottyq jobasy bastaldy. Onyń aıasynda eki júzden astam joǵary synyp oqýshylary dene shynyqtyrý daıyndyǵy boıynsha synaqtan ótti. «Búginde megapolıstiń árbir aýdanynda belsendi jastar jumys isteıdi. «Jastar rýhynda» barlyǵy 4 myńnan astam adam bar. Qańtar oqıǵasy kezinde partııa músheleri 800-ge jýyq otbasyna azyq-túlik sebetin jetkizýge kómektesti. 2000 stýdent kún saıyn ystyq tamaqpen qamtyldy. 290 adamnyń úılerine dári-dármek aparyp berdi. Odan bólek, 660 azamatqa quqyqtyq jáne psıhologııalyq kómek kórsetildi»,- deıdi Ákejan Keńesov.

Ol «Jastar rýhynyń» belsendileri Jeńis kúni qarsańynda «Ardagerlerdi ardaqtaıyq» aktsııasyn uıymdastyrǵanyn atap ótti. Shara aıasynda Almatynyń 20 jalǵyz basty zeınetkeri qamtylǵan.

TazaLike jobasy aıasynda 15 senbilik ótti. «Jastar qanaty Almaty qalasy máslıhatynyń depýtattarymen turaqty túrde kezdesýler ótkizip turady, al jastardy qoldaý jónindegi oblystyq qoǵamdyq keńestiń Almaty qalasyndaǵy jas depýtattar korpýsymen birlesip 5 kóshpeli otyrys ótkizilip, stýdentter jataqhanalarynyń qurylys barysyn baqylaýǵa aldy»,- dedi ol.

Statıstıkaǵa súıensek, Almaty qalasynda 14-35 jas aralyǵyndaǵy jastar sany – 701 myń.