Qańtarda qaraǵandylyqtarǵa 57 myń sharshy metr baspana berildi
Osy jyldyń birinshi aıynda aımaqta 10,3 myń sharshy metr jeke turǵyn úı jáne 34,4 myń kommersıalyq baspana paıdalanýǵa berildi. Memlekettik sektordaǵy turǵyn úılerdiń sany - 13 myń sharshy metr.
«Bıyl qurylys jumystarynyń kútiletin kólemi 5 mlrd teńgeni quraıdy. Bul kórsetkishterge biz «Nurly jol», «Nurly jer» memlekettik baǵdarlamalaryn júzege asyrý jáne «Óńirlerdi damytý-2020» esebinen qol jetkizemiz. Bıylǵy jyly Sátbaev qalasynda bes qabatty 5 turǵyn úıdiń qurylysy, oblystyq mańyzy bar avtojoldardy qaıta jańartý, joldardy kúrdeli jáne ortasha jóndeý, keshendi quıma zaýytynyń, patrondyq zaýyttyń qurylysy jáne taǵy basqalar josparlanǵan», - dep atap ótti Azamat Muqanov.
Aldyn ala málimetter boıynsha, bıyl óńirde ónerkásip pen aýyl sharýashylyǵynda ósim kútilýde. Boljamǵa súıensek, ónerkásiptik ónimniń naqty kólem ındeksi 110% kem bolmaıdy. Buǵan tústi metall kenderiniń óndirisin 20%, bolat óndirisin 92,7% jáne mys óndirisin 7,2% arttyrý esebinen qol jetkizilmek.
Josparǵa sáıkes, taý-ken ónerkásibinde ósim metall kenderi óndirisin 10% ulǵaıtý esebinen bolady.
Budan bólek, óńdeý ónerkásibi, tústi jáne qara metallýrgıa, farmasevtıka jáne mashına jasaý salalaryndaǵy kórsetkishterdiń artýy kútilýde.
«Aýyl sharýashylyǵynda óndiris kólemi mal sharýashylyǵy ónimderiniń úlken kólemi esebinen 101% quraýy tıis. Iri qara mal basy 2,8% ulǵaıyp, 565 myń basty quraıdy dep kútilýde. Jylqy - 5,2%, bul 317,6 myń basqa teń bolady. Qustar sany 1,4% artady. Sonyń arqasynda jyldyq et óndirisi 9,8 myń tonnaǵa, sút 10,2 myń tonnaǵa, jumyrtqa 60,1 mln danaǵa jetedi.
Bıylǵy jyly dándi jáne burshaqty daqyldar 895,5 myń ga alqapta egiledi, bul 2019 jylǵy deńgeıden 3,7% kóp. Maıly, kópjyldyq jáne bir jyldyq shópter 87,7 myń ga aýmaqty alady. Kartop 16 myń gektarǵa, kókónis 3 myń gektarǵa otyrǵyzylady. Bul kórsetkishterdiń barlyǵy ótken jylǵymen salystyrǵanda aıtarlyqtaı joǵary», - delingen málimette.
