Qytaı azamattary Reseıge 30 kúnge deıin vızasyz kire alady

ASTANA.KAZINFORM - Qytaı azamattary Reseıge týrıstik nemese iskerlik maqsatta 30 kúnnen aspaıtyn merzimge barsa, vızasyz kire alady. Bul Reseı prezıdenti Vladımır Pýtınniń jarlyǵynda aıtylǵan, dep habarlaıdy TASS. 

Qujatqa sáıkes, Qytaı azamattary 2026 jyldyń 14 qyrkúıegine deıin Reseıge 30 kúnge deıin vızasyz kire alady. Bul artyqshylyq ózara negizde beriledi jáne iskerlik nemese demalys maqsatyndaǵy, týrıstik saparlarǵa, ǵylymı, mádenı, áleýmettik-saıası, ekonomıkalyq jáne sporttyq is-sharalarǵa qatysýǵa, sondaı-aq el arqyly tranzıtpen ótýge qoldanylady. Vızasyz kirý jáne shyǵý úshin Qytaı azamatynyń jaramdy tólqujaty qajet.

Alaıda, bul shara Reseı Federatsııasyna jumys isteý, oqý nemese turý úshin nemese halyqaralyq avtomobıl tasymalymen júrgizýshi, ekıpaj músheleri, júk ekspedıtorlary nemese aýdarmashy retinde keletin Qytaı azamattaryna qoldanylmaıdy.

Qaýly kúshine endi.

Qytaı tarapy buǵan deıin osyndaı sheshim qabyldaǵan bolatyn, ol da 2026 jyldyń 14 qyrkúıegine deıin kúshinde bolady.

Osyǵan deıin EO-nyń úshinshi eldermen vızasyz saıahatqa qatysty erejelerdi qatańdatqany týraly jazdyq.