«Proton-M» zymyrany Baıqońyrǵa jetkizildi

BAIQOŃYR. QazAqparat - Josparǵa sáıkes, «Spektr-Rentgen-Gamma» ǵarysh observatorııasy Baıqońyr ǵarysh aılaǵynan 2019 jyldyń ekinshi toqsanynda ushyrylady, dep habarlaıdy QazAqparat tilshisi.

Roskosmos baspasóz qyzmeti «Spektr-RG» ǵarysh apparatyn alyp ushatyn «Proton-M» tasymaldaýshy zymyrany Baıqońyrǵa jetkizilgenin málimdedi.

«Proton-M» tasymaldaýshy zymyranynyń M.V. Hrýnıchev atyndaǵy ǵarysh ortalyǵynda jasalǵan bloktary, bas bóligi, sondaı-aq S.P. Korolev atyndaǵy «Energııa» ǵarysh-zymyran korporatsııasynda shyǵarylǵan DM-03 údemeli bloktary tıelgen vagondar Tóretam stansasyna kelip toqtady. Poıyz odan ári Baıqońyr ǵarysh aılaǵynyń 92-alańyna jiberildi. Zymyran sonda qurastyrylady.

«Spektr-RG» ǵarysh observatorııasy - Reseı jáne Germanııanyń halyqaralyq jobasy. Ol orbıtada tolqyn uzyndyqtarynyń rentgen dıapazonynda Ǵalamdy zertteýge arnalǵan astrofızıkalyq observatorııa salý úshin ushyrylmaq.

«Spektr-RG» ǵarysh apparatynyń basty maqsaty - elektromagnıttik sáýlelenýdiń rentgen dıapazonynda Ǵalamdy zertteý jáne Ǵalamnyń adamzat baqylaıtyn bóliginiń «kartasyn» jasaý.

«Proton-M» - Reseıdiń 2019 jyly Baıqońyrdan ushyratyn alǵashqy aýyr zymyrany bolmaq. 2018 jyly Qazaqstan ǵarysh aılaǵynan eki «Proton» zymyrany ushyrylǵan bolatyn. Onyń ekeýi de «Blagovest» serııasynyń áskerı spýtnıkterin orbıtaǵa sátti shyǵarǵan.

Avtor: Sara Qabıqyzy