SQO ekologııa departamenti zaýyt qurylysyn negizsiz tejegen - prokýratýra
ASTANA. KAZINFORM - Soltústik Qazaqstan oblysynyń prokýrorlary jergilikti ınvestordyń problemalaryn sheshti. Bul týraly organnyń baspasóz qyzmeti málim etti.
Petropavl qalasynda «TFA GROUP» JShS ınvestıtsııa kólemi 9,2 mlrd teńge bolatyn «Keramıkalyq kirpish zaýytyn salý» jobasyn júzege asyryp, 105 jańa jumys ornyn ashady.
Buǵan deıin ekologııa departamenti ınvestorǵa zaýyt qurylysyn «Sevkazenergo» AQ-men kelisý týraly usynyspen aldyn ala qorytyndy ǵana bergen. Óz kezeginde monopolıst resmı negizder boıynsha qurylys tártibin bekitýden bas tartady. Alaıda bul rette kelisý mindetti emes edi.
Oblystyq prokýratýranyń front-ofısi bıýrokratııalyq kidiristerdiń aldyn alý jáne ınvestorlardan qajetsiz qujattardy talap etý tájirıbesin toqtatý boıynsha ekologııa departamentine nusqama baǵyttady.
Nátıjesinde qadaǵalaý organynyń úılestirýimen oń ekologııalyq qorytyndy shyǵaryldy. Jobany ilespe qoldaý jalǵasady jáne másele oblys prokýratýrasynyń baqylaýynda bolady.
