Problemaly nesıeler servıstik kompanııalardyń senimgerlik basqarýyna beriledi

NUR-SULTAN. QazAqparat – Problemaly ınvestıtsııalyq nesıeler servıstik kompanııalardyń senimgerlik basqarýyna beriledi. Bul jaıynda QR Qarjy naryǵyn retteý jáne damytý agenttigi tóraǵasynyń orynbasary Oljas Qızatov ortalyq kommýnıkatsııalar qyzmetindegi brıfıngide aıtty dep habarlaıdy QazAqparat tilshisi.

«4 shildede Memleket basshysy strestik aktıvter naryǵyn damytý boınysha keıbir zańnamalyq aktilerge ózgerister men tolyqtyrýlar engizýdi kózdeıtin zańǵa qol qoıdy. Ol zańnyń erejeleri 4 qyrkúıekte qoldanysqa engizildi. Zańda servıstik kompanııalar ınstıtýtyn qurý kózdeledi. Olar ınvestorlarǵa jumys istemeıtin kredıtterge qyzmet kórsetý jáne basqarý qyzmetterin kórsetedi. Jeke ınvestorlar úshin jumys istemeıtin kredıtterdi satý kezinde servıstik kompanııalar ınstıtýtyn engizý mańyzdy. Sebebi bul kompanııalardyń problemalyq qaryz alýshylarmen jumys isteýde tıisti jumys tájirıbesi men quzyreti bolady. Servıstik kompanııalar aktıvterdi senimgerlik túrde basqarady. Óndirip alýdyń jeke strategııasyn ázirlep, iske asyrady jáne strestik aktıvterdiń menshik ıelerine basqa da qyzmetter kórsetedi», - dedi Oljas Qızatov.

Ol qyzmetter mynalar:

- qaryz sharty týraly aqparatty jınaý, óńdeý, esepke alý, ákimshilendirý, taldaý, onyń oryndalýyn monıtorıngteý;

- jeke ınvestor men boryshker arasynda odan ári birlesken bıznes úshin kelissózder protsesin qurý, boryshkermen jáne onyń ókilimen, boryshkerge kredıt bergen jeke ınvestordyń mindettemelerimen baılanysty úshinshi tulǵamen ózara is-qımyl jasaý;

- qaryz shartynyń tártibi men talaptaryn ózgertý;

- nesıe salynǵan jobany ekonomıkalyq aınalymǵa engizý úshin qarajat salý qajet bolsa, aıaqtalmaǵan qurylys obektilerin nemese ózge de múliktik keshenderdi qarjylandyrý;

- sotta, onyń ishinde bereshekti óndirip alý jáne kepil nysanasyn óndirip alý protsesinde jeke ınvestordyń múddesin qorǵaý;

- jeke ınvestordyń múddesi úshin baǵalaýshylardyń, aýdıtorlardyń, zańgerlerdiń jáne ózge de konsýltanttardyń qyzmetterin tartý jáne paıdalaný;

- qaryz alýshylardyń shaǵymdaryn qaraý jáne senimgerlik basqarý shartynda kózdelgen basqa da qyzmet túrleri.

Foto: ortcom.kz