Problemaly kredıtti kollektorlyq uıymdarǵa satýǵa tyıym salynady
Kollektorlyq agenttikterdiń keıbir qyzmetterine shekteý engizilmek. Bul týraly Májiliste «Halyqtyń shamadan tys kredıt alýyn azaıtý jáne qarjy saýattylyǵyn arttyrý» taqyrybyndaǵy Parlament tyńdaýynda Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty, dep habarlaıdy Kazinform.
«2021 jyldan bastap kollektorlardyń basshy qyzmetkerlerine tıisti talaptar zańnamalyq turǵyda engizildi. Kollektorlardyń boryshkermen is-qımyl protsesin aýdıo jáne beınejazba túrinde tirkeý mindeti, sondaı-aq úshinshi tulǵalarmen baılanys jasaýǵa tyıym salý engizildi. Budan bólek, kollektorlyq agenttikter kapıtalyna qoıylatyn talaptar 100 mln teńgege deıin kúsheıtildi. Bas prokýratýramen birlesip kollektorlardyń derbes, ákimshilik jáne qylmystyq jaýapkershiligin engizý jóninde túzetýler ázirlendi. Olar Parlament Májilisiniń qaraýynda», – dedi M. Ábilqasymova.
Onyń sózine qaraǵanda, jyl basynan kollektorlar portfeli 57,3 paıyzǵa artty. Qaryz alýshylardyń sany 882 myń adamǵa deıin jetti.
«Olardyń bereshegi 325 mlrd teńgeni qurady. Kollektorlar mundaı problemaly kredıtterdi aıtarlyqtaı dıskontpen satyp alady da, qaryzdy qaıta qurylymdamaı, borysh somasyn óndirip alady. Osyǵan baılanysty biz (Qarjy naryǵyn retteý jáne damytý agenttigi) kollektorlyq uıymdarǵa bankterdiń tutyný nesıeleri men azamattardyń shaǵyn nesıelerin satýǵa tyıym salý týraly usynysty qoldaımyz. Sondaı-aq kollektorlardy problemaly nesıeler boıynsha bereshekti retteýdi zańnamalyq deńgeıde júrgizýge mindetteýdi usynamyz. Bul shekteýler kollektorlyq naryqtyń tolyq toqtaýyn bildirmeıdi. Kollektorlar problemaly kredıtterdi satyp almaı-aq, olardy óndirip ala beredi. Alaıda bul nesıeler qarjy uıymdarynda qalady jáne olar problemaly boryshkerlermen jumys úshin jaýapty bolady. Budan basqa, kollektorlar jeke kásipkerler men zańdy tulǵalardyń stresstik aktıvterin basqarý jónindegi servıstik kompanııalardyń rólin de atqarady», – dedi agenttik basshysy.
Budan buryn habarlanǵandaı, Májilis tóraǵasy Erlan Qoshanov kollektorlyq uıymdarǵa qatysty usynys aıtqan bolatyn.
«Jeke adamdarǵa beriletin nesıeler boıynsha shekti paıyzdyq mólsherlemeni tómendetý kerek. Osy nesıelerdi kollektorlyq uıymdarǵa satýǵa tolyq tyıym salynýy tıis. Kámeletke tolmaǵan balalary bar otbasylardyń jalǵyz baspanasynan aıyrylyp, kóshede qalýyna jol bermeý qajet», - dedi E. Qoshanov.
