Prezıdenttiń synynan keıin densaýlyq saqtaý salasynda qandaı ózgerister bolady

ASTANA. KAZINFORM - Sońǵy kezderi Qazaqstan qoǵamynda mindetti medıtsınalyq saqtandyrý júıesi (MMSJ) birneshe ret synǵa ushyrady. MMSJ-ny Memleket basshysy Qasym-Jomart Toqaev ta qatty synǵa aldy.

Memleket basshysynyń aıtýynsha, resýrstar tıimsiz paıdalanylyp, bul óz kezeginde salada qarjylyq qıyndyqtar týdyryp otyr. Osyǵan baılanysty densaýlyq saqtaý mınıstrligi salanyń júıeli problemalaryn zerttedi.

Densaýlyq saqtaý salasynda engiziletin ózgerister týraly Kazinform agenttiginiń materıalynda.

Buǵan deıin Qazaqstan prezıdenti Qasym-Jomart Toqaev mindetti áleýmettik medıtsınalyq saqtandyrý júıesinde naqty nátıje joq ekenin aıtqan bolatyn.

«Medıtsınaǵa bólinetin qarjy kólemi artqanymen, qordalanǵan máseleler áli sheshimin tappaı jatyr. Mindetti áleýmettik medıtsınalyq saqtandyrý júıesi tıimsiz bolyp shyqty, naqty nátıje joq. Úsh mıllıonǵa jýyq adam medıtsınalyq saqtandyrýsyz qaldy, sonyń saldarynan olar medıtsınalyq qyzmetterdi tolyq paıdalana almaıdy», - dedi Qasym-Jomart Toqaev Úkimettiń keńeıtilgen otyrysynda.

Óz kezeginde jýyrda ǵana taǵaıyndalǵan Densaýlyq saqtaý mınıstri Aqmaral Álnazarova vedomstvo otyrysynda sapasyz medıtsınalyq qyzmet kórsetý, medıtsınalyq kómekti uıymdastyrýdaǵy kemshilikter, etıka jáne deontologııa normalaryn buzý faktileri boıynsha aryz-shaǵymdar men ótinishterdiń kóbeıip kele jatqanyn moıyndady. Eń kóp shaǵymdar Almaty, Jetisý jáne Abaı oblystarynda tirkeldi.

Mınıstr mindetti áleýmettik medıtsınalyq saqtandyrý júıesi engizilgeli oǵan ketetin shyǵynnyń ósip, 2023 jyly onyń 2,6 trln teńgege jetkenine nazar aýdardy. Sonymen qatar ol saqtandyrylǵan adamdardyń arasynda tegin medıtsınalyq kómekti ala alatyndarynyń sany shekteýli ekenin atap ótti.

«Joǵaryda atalǵan máselelerdi sheshý úshin medıtsınalyq kómek júıesin jańǵyrtý boıynsha keshendi sharalar qabyldap, resýrstardy únemdeýge jáne azamattardyń qajettilikterin qanaǵattandyrýǵa basa nazar aýdara otyryp, ashyqtyqty, tıimdilikti, qarjy resýrstaryn utymdy paıdalanýdy qamtamasyz etý qajet», - dedi mınıstr.

Qarjylyq turaqtylyqty qamtamasyz etý úshin qandaı júıeli sharalar usynylady ?

Aqmaral Álnazarovanyń aıtýynsha, memlekettik medıtsına uıymdarynyń qarjylyq turaqtylyǵyn qamtamasyz etý jónindegi sharalar keshenin jaqyn arada qabyldaý qajet, sondaı-aq 400-den astam medıtsınalyq uıymnyń 82 mlrd teńge somasyndaǵy kredıtorlyq beresheginiń paıda bolý sebepterin anyqtaý qajet.

Tarıfterdi belgileý júıesiniń jetildirilmeýi jáne medıtsınalyq kómek kólemin anyqtaýdaǵy ashyqtyqtyń bolmaýy qazirgi qalyptasqan jaǵdaıdyń negizgi sebepteri bolyp otyr.

Mınıstrdiń aıtýynsha, birinshi jartyjyldyqta bólingen qarajatty basym baǵyttarǵa qaıta bóle otyryp, emdeý-dıagnostıkalyq protsesterdi ońtaılandyrý júrgiziledi, medıtsınalyq kómek kólemin, shyǵystardy jáne tarıf saıasatyn josparlaýdyń birqatar memlekettik fýnktsııasyn densaýlyq saqtaý mınıstrliginiń qaraýyna qaıtarý josparlanyp otyr.

Sondaı-aq, onyń aıtýynsha, medıtsına uıymdarynyń basshylary óz kásiporyndarynyń rentabeldilik máselesin sheshýi qajet jáne kredıtorlyq bereshektiń qalyptasý jaǵdaılary jan-jaqty tekserilip, kináliler jaýapqa tartylady.

Dári-dármekpen qamtamasyz etý júıesi qaıta qaralady

«Densaýlyq saqtaý mınıstrligi ambýlatorlyq-emhanalyq dári-dármekpen qamtamasyz etý júıesin ońtaılandyrý boıynsha keshendi jumys bastady, munda negizgi basymdyq dárilik zattardyń sapasyn baqylaýǵa beriledi», - dedi QR Densaýlyq saqtaý mınıstri Aqmaral Álnazarova.

Ol sońǵy jyldary 2 ese ósken ambýlatorlyq dárilermen qamtamasyz etý shyǵyndarynyń artýyna alańdaýshylyq bildirdi. Bul rette 41 nozologııa boıynsha naýqastyń tek 50% -y ǵana qamtamasyz etiledi.

Dári-dármekpen qamtamasyz etý kóleminiń jalpy ulǵaıýyna qaramastan, ambýlatorlyq dári-dármekpen qamtamasyz etiletin naýqastardy aýrýhanaǵa jatqyzý deńgeıi tómendegen joq.

Densaýlyq saqtaý mınıstrligi zerthanalyq qyzmet júıesin qaıta qaraýdy josparlap otyr

«Medıtsınalyq kómektiń qoljetimdiligine qatysty máselelerdi sheshý úshin ambýlatorlyq-emhanalyq kómek deńgeıinde patsıentterdiń birqatar marshrýty qaıta qaralady», - dedi Aqmaral Álnazarova ótken aptada OKQ-da ótken brıfıngte.

Vedomstvo basshysy patsıentterdiń marshrýtyn utymdy rettemeý, tıimsiz standarttar konsýltatsııalyq-dıagnostıkalyq qyzmetterdiń jasandy ósýine yqpal ete otyryp, azamattardyń narazylyǵyn týdyratynyn, sondaı-aq jalpy praktıka dárigerine júktemeni arttyratynyn atap ótti.

«Naýqastardy aýrýdy basqarý baǵdarlamasymen qamtý formaldy sıpatqa ıe. Skrınıngtik zertteýlerge keletin bolsaq, patologııany anyqtaý deńgeıi áli de tómen ekenin moıyndaý kerek. Bul rette skrınıngtik zertteýler júrgizýdiń ádis-tásilderin qarastyryp, basym baǵyttardy anyqtaý tapsyryldy», - dedi vedomstvo basshysy.

Sonymen qatar, kezek kúttirmeıtin is-sharalar josparyna zerthanalyq qyzmetterdiń qurylymyn taldaý jáne tarıfterdi qaıta qaraýdy eskere otyryp, konsýltatsııalyq-dıagnostıkalyq qyzmetterdiń tizbesin jańartý kiredi.

Esterińizge sala keteıik, Memleket basshysy bıylǵy 1-sáýirge deıin medıtsınalyq kómektiń biryńǵaı paketin qabyldaýdy tapsyrǵan bolatyn.

Juqpaly aýrýlarmen kúreste qandaı ózgerister bar ?

«Basty mindetterdiń biri - ınfektsııalyq emes aýrýlardyń salmaǵyn jeńildetý bolyp otyr. Ol úshin boljam, saýyqtyrý, aýrýdy anyqtaý men emdeýdi qosa alǵanda, aýrýlardyń jalpy salmaǵynyń táýekel faktorlaryn epıdemıologııalyq baqylaý júıesin engizý qajet», - dedi Aqmaral Álnazarova.

Vaktsınamen basqarylatyn juqpaly aýrýlar týraly aıta kele, mınıstr epıdemıologııalyq baqylaý bóligindegi júıeli kemshilikterge nazar aýdardy.

«Osyǵan baılanysty ınfektsııalyq aýrýlardy boljaý jáne baqylaý júıesin kúsheıtý, naqty ýaqyt formatynda temperatýralyq rejımdi baqylaý múmkindigimen profılaktıkalyq ekpeler men vaktsınalardy esepke alý júıesin tsıfrlandyrýdy qamtamasyz etý, densaýlyq saqtaýdyń barlyq deńgeılerinde medıtsına qyzmetkerlerin oqytýdy jolǵa qoıý, múddeli organdarmen jáne vedomstvolarmen birlesip basqarylatyn ınfektsııalardyń aldyn alýda vaktsınatsııalaýdyń mańyzdylyǵy týraly halyqty keńinen habardar etýdi qamtamasyz etý qajet dep sanaımyn,- dedi Densaýlyq saqtaý mınıstrliginiń basshysy.

Ál-aýqaty nashar qazaqstandyqtar jergilikti bıýdjet esebinen medıtsınalyq saqtandyrý júıesine engiziledi

Aqpan aıynyń basynda Úkimette ótken brıfıngte vıtse-premer Tamara Dúısenova Qazaqstanda MMSJ joıylmaıtynyn aıtty.

«Álemdegi medıtsınalyq saqtandyrý júıesi – aqsha klıent úshin prıntsıpin júzege asyrýdy qamtamasyz etetin birden-bir júıe. Eger durys jolǵa qoıylsa, árbir emhana men aýrýhana sapaly medıtsınalyq kómek kórsetý úshin kelgen adamdarǵa qyzyǵýshylyq tanytýy kerek. Iá, bizde problemalar bar. Adamdar sapaly kómek alýy úshin bul júıeni ózgertýimiz kerek», - dep túsindirdi Tamara Dúısenova.

Keıinirek Densaýlyq saqtaý mınıstri Aqmaral Álnazarova vedomstvo alqasynyń keńeıtilgen otyrysynda Memleket basshysynyń tapsyrmasy boıynsha 2025 jyldyń 1 qańtarynan bastap jergilikti bıýdjetter esebinen ál-aýqat deńgeıi tómen adamdardy saqtandyrý qamtamasyz etiletinin habarlady.

Onyń aıtýynsha, bul 400-den astam medıtsınalyq uıymdardyń 82 mıllıard teńge somasyndaǵy kredıtorlyq bereshegin sheshýdiń bir joly. Eń kóp qaryz Astana, Almaty jáne Shyǵys Qazaqstan oblysynyń medıtsınalyq uıymdarynda tirkelgen.