Prezıdenttiń AQSh-qa saparyndaǵy kelisimder ońtaıly nátıje beredi — sarapshy

ASTANA. KAZINFORM — Saıasattanýshy Talǵat Qalıev Memleket basshysynyń AQSh-qa sapary men «C5+1» formatyndaǵy sammıtke qatysty pikir aıtty. 

— Prezıdent Qasym-Jomart Toqaevtyń Vashıngtonǵa saparyna AQSh-tyń ózi múddeli boldy. Atap aıtqanda, bul sapar aıasynda Memleket basshysy Prezıdent Donald Tramppen kelissóz júrgizip, «Ortalyq Azııa — AQSh» sammıtine qatysty. Qazirgi jaǵdaıda AQSh úshin Ortalyq Azııanyń mańyzdylyǵy aıqyn kórinip tur. Ortalyq Azııadaǵy turaqtylyqqa AQSh múddeli. Sondyqtan olar Qazaqstanǵa, Ortalyq Azııa elderine ınvestıtsııa baǵyttaýǵa ekpin qoıyp, ekonomıkalyq qarym-qatynasty nyǵaıtýǵa tyrysady, — dedi Talǵat Qalıev.

Onyń aıtýynsha, Qazaqstan Prezıdentiniń kelissóz júrgizýdegi mol tájirıbesiniń arqasynda osy sapardaǵy kelisimder ońtaıly nátıje beredi.

— Birqatar mańyzdy kelisim jasaldy. Máselen, Orta dálizdi odan ári damytýǵa yqpal etýge arnalǵan kelissóz boldy. Eýropaǵa týra shyǵýǵa múmkindik beretin osy dálizdiń mańyzy zor ekeni túsinikti. Sapar barysynda Qazaqstan men AQSh arasynda jalpy 17 mlrd dollardan asatyn kommertsııalyq kelisimderge qol qoıyldy. Endi osy aýqymdy ýaǵdalastyqty sapaly oryndaý qazaqstandyq kompanııalarǵa, ákimder men Úkimetke qatysty. Atap aıtqanda, bul ınvestıtsııalardyń tolyqqandy tartylýyna barynsha áreket etý kerek. Kompanııalardyń, ákimdikterdiń jáne memlekettik organdar bul baǵyttaǵy jumystardy durys úılestirýi tıis. Jalpy, aýqymdy kelissózge qarasaq, bul sapardy óte nátıjeli boldy dep baǵalaımyn, — dedi sarapshy.

Budan buryn habarlanǵandaı, Qasym-Jomart Toqaevtyń AQSh-qa sapary aıasynda Qazaqstan men Qurama Shtattary arasynda jalpy somasy 17 mıllıard dollardan asatyn kommertsııalyq kelisimderge qol qoıyldy. 

Sonymen qatar, Memleket basshysy «Ortalyq Azııa — AQSh» sammıtine qatysty. 

Qazaqstan Prezıdenti Chevron korporatsııasy dırektorlar keńesiniń tóraǵasy Maıkl Ýırtti qabyldady.