Prezıdenttik jastar kadr rezerviniń 1 ornyna 148 adam úmitker boldy
ASTANA. KAZINFORM — Memlekettik qyzmet isteri agenttiginiń tóraǵasy Darhan Jazyqbaı Prezıdenttik jastar kadr rezervine irikteý qorytyndylary boıynsha brıfıng ótkizip, bıylǵy irikteý boıynsha rezervke qabyldanǵan jastarmen kezdesti.
Jastarmen basqosý barysynda agenttik tóraǵasy rezervshilerdi Prezıdenttik jastar kadr rezervine irikteýden ótýimen quttyqtap, jobanyń kásibı memlekettik qyzmetshilerdiń jańa býynyn qalyptastyrýdaǵy strategııalyq mańyzdylyǵyna toqtaldy.
Ol sondaı-aq Prezıdenttik jastar kadr rezervine qatysý jastarǵa mansaptyq ósý men elge qyzmet etýge múmkindik beretinin aıtty.
— Sizderden kásibılikpen qatar, adaldyq, ashyqtyq jáne memleket isine degen shynaıy janashyrlyqty kútemiz. Sizderge artylǵan senim — sizder úshin úlken jaýapkershilik. Sebebi sizder irikteý barysynda óz qarym-qabiletterińizdi kórsete bildińizder, endi sizderdiń aldaryńyzda sony tájirıbe júzinde dáleldeý mindeti tur, - dedi Darhan Jazyqbaı.
Kezdesý aıasynda aldaǵy ózara árekettesý men memlekettik qyzmetke ornalasý múmkindikteri jáne basqarýshylyq quzyretterdi damytýǵa arnalǵan bilim berý baǵdarlamalaryna qatysý máseleleri talqylandy.
Basqosý sońynda agenttik tóraǵasy rezerv ókilderine sáttilik tilep, olardyń qarym-qabileti men bilimin el ıgiligi jolynda jumsaıtyndyqtaryna senim bildirdi.
Al brıfıng barysynda agenttik tóraǵasy buqaralyq aqparat quraldarynyń ókilderine rezervke tórtinshi irikteýdiń qorytyndylary, rezervshilerdiń memlekettik qyzmetke jumysqa ornalasý tártibi jáne olarǵa beriletin múmkindikter týraly aqparat berdi.
Darhan Jazyqbaı irikteý protsessiniń árbir kezeńiniń erekshelikterine jan-jaqty toqtaldy.
Aıta ketý kerek, Memleket basshysynyń bastamasymen júzege asyrylyp kele jatqan strategııalyq mańyzdy joba — Prezıdenttik jastar kadr rezervine tórtinshi irikteý qazan aıynyń sońynda aıaqtalǵan bolatyn.
Jobanyń negizgi maqsaty — memlekettik basqarý júıesine bilimdi, jaýapkershilikti jáne joǵary kásibı bilikti jastardy tartý.
Nıet bildirgen 31 myńnan astam úmitkerdiń ishinen 7 436 adam irikteýge qatysýǵa jiberildi. Alty kezeńnen turatyn irikteý nátıjesinde rezervke 50 úzdik jas maman qabyldandy. Bir orynǵa 148 adamnan kelip, bul kórsetkish 2023 jylǵy irikteýmen salystyrǵanda 16%-ǵa joǵary boldy.
Buǵan deıin QR Prezıdenti janyndaǵy Jastar kadr rezervi jónindegi ulttyq komıssııa otyrysynda 50 adam Prezıdenttik jastar kadr rezervine qabyldanǵanyn jazǵan edik.