Prezıdenttiń mańyzdy on baǵyty: Aqtóbede 1400 kásiporyn jalaqyny orta eseppen 15 paıyzǵa ósiredi

AQTÓBE. QazAqparat - Prezıdent Qasym - Jomart Toqaevtyń ulyqtaý rásiminde óńirlerde halyq tabysyn arttyrý týraly mindet júktegen bolatyn. Osyǵan oraı Aqtóbe oblysynda halyq tabysy jyl saıyn 9-12 paıyzǵa artady. 2025 jylǵa qaraı jalaqy respýblıkalyq ortasha deıgeıge jetedi, dep habarlaıdy QazAqparat tilshisi.

«Aqtóbe oblysynyń ákimdigi halyq tabysyn arttyrý baǵyty boıynsha keshendi jospar ázirledi. 2025 jylǵa qaraı oblys turǵyndarynyń ortasha tabysy respýblıkalyq ortasha jalaqyǵa teńesýi tıis. Ol úshin jańa óndiris pen jumys oryndary ashylady. 2019 jyly 25 óndiristik ınvestıtsııalyq joba iske asyrylady. Al aýyl sharýashylyǵy salasynda 200 joba qolǵa alynady. Jyl saıyn shaǵyn jáne orta bıznesti damytyp, 2025 jylǵa qaraı bul sala oblys ekonomıkasynyń 30 paıyz quraýy tıis. Ol úshin bıyl bızneske 40 mıllıard teńge jumsalady», - dep habarlady oblys ákiminiń baspasóz qyzmeti.

Sonymen qatar halyq tabysyn arttyrý baǵytyn iske asyrý úshin 570 mıllıard teńge kóleminde ınvestıtsııa tartý kózdeldi. Ári iri óndiris oryndaryndaǵy jumysshylardyń eńbekaqysyn ósirý jaıy qatań baqylaýda bolady.

«Bıyl 1400 kásiporyn jalaqyny orta eseppen 15 paıyzǵa ósiredi. Bul 32 myńnan astam aqtóbeliktiń eńbekaqysy kóteriledi degen sóz. Óńirde jumys istep júrgen adamdardyń 20 paıyzy óndiris salasynda eńbek etedi. ıAǵnı, 84 myń adam. Olardyń ortasha jalaqysy 184,8 myń teńgeni qurap otyr. Munaı óndirý úshin jańa geologııalyq barlaý jumystaryn júrgizý, qara altyndy óndirýde jańa tehnologııany paıdalaný bul salaǵa jańa serpin beredi. Óńirde aýyl sharýashylyǵy salasynyń áleýeti joǵary. Alaıda aýyl sharýashylyǵy salasynyń óńir ekonomıkasyndaǵy úlesi bar bolǵany 5 paıyzdy qurap otyr. Ári osy salada eńbek etetin adamdar orta eseppen 83 myń teńge jalaqy alady. Bul oblystaǵy ortasha jalaqydan 40 paıyzǵa tómen», - dep habarlady oblys ákiminiń baspasóz qyzmeti.

Óńir aýyl sharýashylyǵy salasyn damytý úshin mal basyn arttyryp, sýarmaly jer kólemin ósirýdi kózdep otyr. Sonymen qatar qus etin óndirý, dástúrli emes sharýashylyqty damytý mańyzdy. Aqtóbeniń kólik-logıstıkalyq múmkindigin paıdalanyp ishki naryqty qamtyp, ónimdi eksportqa shyǵarýǵa bolady. Qazir oblystaǵy 430 aýyl sharýashylyǵy qurylymynyń 220 myń gektar jaıylymy bar. Onda mal sharýashylyǵyn damytýǵa bolady.

Eske sala keteıik, 12 maýsymda ótken ulyqtaý rásimi barysynda Qasym-Jomart Toqaev on mańyzdy baǵytyn jarııalaǵan bolatyn.