Prezıdenttiń halyqaralyq yntymaqtastyq jónindegi arnaýly ókili Vashıngtonǵa jumys saparymen bardy
Bıylǵy 8-10 jeltoqsanda Prezıdenttiń halyqaralyq yntymaqtastyq jónindegi arnaýly ókili Erjan Qazyhan Vashıngtonǵa jumys saparymen bardy.
Aq úıdiń, Memlekettik departamenttiń jáne AQSh Kongresiniń resmı ókilderimen ótken kelissózder ekijaqty yntymaqtastyqtyń keń aýqymdy máselelerin talqylaýǵa, birqatar halyqaralyq problema boıynsha, onyń ishinde aımaqtyq qaýipsizdik pen turaqtylyqty saqtaýǵa, pandemııaǵa qarsy is-qımyl jáne klımattyń ózgerýine qarsy kúreske baǵyttalǵan máseleler boıynsha pikir almasýǵa múmkindik berdi. Arnaýly ókil Qazaqstandaǵy saıası jáne ekonomıkalyq reformalarǵa qatysty máselege erekshe nazar aýdardy. Kezdesý qorytyndysy boıynsha Nur-Sultan men Vashıngton arasyndaǵy keńeıtilgen strategııalyq seriktestikti odan ári jandandyrý jóninde naqty kelisimderge qol jetkizildi.
AQSh Memlekettik hatshysynyń azamattyq qaýipsizdik, demokratııa jáne adam quqyqtary máseleleri jónindegi orynbasary Ý.Zeıa Qazaqstan Prezıdenti Qasym-Jomart Toqaevtyń adam quqyqtary men bostandyqtaryn, zań ústemdigin jan-jaqty qamtamasyz etýge jáne memlekettik basqarý júıesin odan ári jandandyrýǵa baǵyttalǵan reformalarynyń tıimdi iske asyrylyp jatqanyna qoldaý bildirdi. Taraptar 2022 jyly Adam quqyqtary boıynsha joǵary deńgeıdegi ekijaqty dıalogty bastaý týraly ýaǵdalastyqqa qol jetkizdi.
Memlekettik departament basshylyǵymen kezdesý barysynda saıası jáne ekonomıkalyq salalardaǵy ekijaqty yntymaqtastyq, «S5+1» formatyndaǵy óńirlik dıalogty nyǵaıtýdyń perspektıvalary, sondaı-aq Aýǵanstandaǵy jaǵdaıdy turaqtandyrýǵa járdemdesý máseleleri talqylandy. Amerıkalyq tarap Qazaqstannyń aýǵan halqyna is-júzinde kórsetken gýmanıtarlyq kómegin, sondaı-aq Nur-Sultannyń Aýǵanstandaǵy gýmanıtarlyq daǵdarysqa jol bermeý jónindegi halyqaralyq kúsh-jigerdi úılestirýdegi rólin joǵary baǵalady.
AQSh Kongresiniń músheleri E.Ber, R.Aderholt jáne S.Shabotpen ótken kezdesýlerde AQSh Kongresinde Qazaqstannyń dostary tobynyń áleýetin barynsha arttyra otyryp, parlamentaralyq yntymaqtastyqty tereńdetýdiń mańyzdylyǵyna mán berildi. Amerıkalyq parlamentarıler Memleket basshysy júrgizip jatqan saıası reformalardy joǵary baǵalap, ekijaqty ózara
is-qımyldyń áleýetin barynsha ashýǵa járdemdesýge daıyn ekendikterin jetkizdi.
Sapar aıasynda Erjan Qazyhan Qazaqstan Táýelsizdiginiń 30 jyldyǵyna jáne AQSh-pen dıplomatııalyq qarym-qatynas ornatýǵa arnalǵan Konventsııanyń jumysyna qatysty. Memlekettik departamentten, saýda mınıstrliginen, ıÝSAID-ten jáne AQSh Saýda ókili keńsesinen kelgen is-shara qonaqtary men qatysýshylary, sondaı-aq Vashıngtonnyń taldaý ortalyqtarynyń qyzmetkerleri Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń Táýelsiz Qazaqstandy qurýdaǵy, eýrazııalyq keńistiktegi turaqtylyqty, qaýipsizdikti jáne ornyqty damýdy qamtamasyz etýdegi úlken rólin, Qazaqstan-Amerıka strategııalyq áriptestiginiń mańyzdylyǵy men nátıjeliligin, Nur-Sultannyń birqatar halyqaralyq problemany sheshýge ólsheýsiz úles qosqanyn atap ótti.
Konventsııanyń arnaıy sessııasy Qazaqstan men AQSh arasyndaǵy saýda-ekonomıkalyq áriptestikke arnaldy. Qazaqstanda jumys isteıtin amerıkalyq kompanııalardyń ókilderi Qazaqstan úkimetiniń sheteldik ınvestıtsııalardy tartý, sondaı-aq memleket pen ınvestorlar arasyndaǵy ashyq dıalogty qamtamasyz etý jónindegi kúsh-jigeriniń tıimdiligin atap ótti.
Іs-shara aıasynda Ortalyq Azııa jáne Kavkaz Instıtýty professorlary F.Starr jáne S.Kornelldyń «Strong and Unique: three Decades of US-Kazakhstan Partnership» atty kitabynyń tusaýkeseri ótti. Kitap Qazaqstan táýelsizdik alǵan sátten bastap ekijaqty qarym-qatynastardyń damý tarıhyn qamtıtyn alǵashqy keshendi zertteý eńbegi bolyp tabylady.
Sapar qorytyndysy boıynsha Qazaqstannyń AQSh-taǵy Elshiliginiń uıymdastyrýymen Qazaqstan Táýelsizdiginiń 30 jyldyǵyna arnalǵan saltanatty qabyldaý ótti.
