Prezıdenttikke úmitker usyný boıynsha 35 ótinish tústi - OSK

NUR-SULTAN. QazAqparat - Ortalyq saılaý komıssııasy 2019 jyldyń 9 maýsymynda ótetin kezekten tys prezıdenttik saılaýǵa úmitkerlerdi usyný kezeńin qorytyndylady, dep habarlaıdy QazAqparat tilshisi.

OSK tóraǵasynyń orynbasary Konstantın Petrovtyń aıtýynsha, atalǵan aralyqta saılaý komıssııasyna 9 birlestikten basqa 35 ótinish kelip túsken.

«29 ótinish jeke tulǵalardan tústi, onyń bireýi - azamattar tobynan, 6 - zańdy tulǵalardan, onyń ishinde óńirlik qoǵamdyq qordan kelip tústi. Ótinishter poshta konvertteri, elektrondyq úkimet portaly, Ortalyq saılaý komıssııasynyń elektrondyq poshtasy arqyly jáne qolma-qol qabyldandy», - dedi Petrov OSK otyrysynda.

Sıpaty boıynsha ótinishter saılaý protsesin uıymdastyrý (11), saılaý zańnamasy máseleleri boıynsha túsiniktemeler (12), talapqa saı kelmeıtin sýbektilerden Prezıdenttikke kandıdattardy usyný (12) jóninde bolǵan.

«32 ótinish boıynsha onyń ıelerine jaýap berildi jáne búgin kelgen bir ótinish qarastyrylyp jatyr. Ortalyq saılaý komıssııasynyń quzyryna jatpaıtyn eki ótinish tıisti organdarǵa jiberildi.

Aıta keteıik, 2019 jyldyń 28 sáýirinde saǵat 18.00-de QR Prezıdenttigine kandıdattardy usyný kezeńi aıaqtaldy.

Nátıjesinde prezıdenttik saılaýǵa qatysý úshin 9 respýblıkalyq qoǵamdyq birlestiktiń, onyń ishinde 4 saıası partııanyń ókilderi QR Ortalyq saılaý komıssııasyna tıisti qujattar ótkizdi.

Ortalyq saılaý komıssııasy arqyly úmitkerlikke sáıkestigi anyqtalǵan 4 kandıdat qazirgi ýaqytta qol jınaýǵa kirisip ketti. Olar 12 oblystan, respýblıkalyq mańyzy bar qalalardan jáne astanadan 11 mamyrǵa deıin keminde 118 140 qol jınaýy qajet.

Ózge kandıdattardyń zańnamaǵa sáıkestigi aldaǵy kúnderi belgili bolady.

QR Prezıdenttigine kandıdattardy tirkeý 2019 jyldyń 11 mamyrynda saǵat 18.00-de aıaqtalady.