Prezıdenttik jastar kadr rezerviniń jeńimpazy: Konkýrs ashyq ári ádil ótti
Olar búginde elimizdiń ár óńiri men túrli salada elge qyzmet etýde. Sonyń biri, atalǵan joba jeńimpazy, Injınırıng jáne tehnologııa transferti ortalyǵy AQ-nyń prezıdenti Іlııas Ospanov. QazAqparat tilshisine atalǵan azamatpen pikirlesýdiń sáti tústi.
«Men elordadaǵy L. Gýmılev atyndaǵy EUÝ-in ınjener mamandyǵy boıynsha támamdadym. Alǵashqy eńbek jolymdy «Astana Sý Arnasy» mekemesinde ınjener bolyp bastadym. Sodan soń óz mamandyǵym boıynsha bilimimdi Londonda jalǵastyrdym. Odan keıin «Bolashaq» baǵdarlamasy boıynsha baıqaýsyz memlekettik qyzmetke shaqyrtý aldym. Nátıjesinde ınnovatsııalyq tehnologııalar salasynda 4 jyl eńbek etip, departament basshysynyń orynbasary qyzmetine deıin kóterildim. Ol kezde jas boldyq, jumys óte kóp ári qyzyq boldy. Keıin kele óńirlerde túrli joǵary qyzmette boldym. Odan soń jeke kompanııada ınnovatsııa salasynda jumys istedim. Osyǵan deıin Dúnıejúzilik banktiń jobasynda eńbektendim. Al qazirgi ýaqytta Injınırıng jáne tehnologııa transferti ortalyǵy AQ-nyń prezıdentimin», - dedi Іlııas Ospanov.
Onyń aıtýynsha, atalǵan baıqaýǵa áriptesteriniń usynysy boıynsha qatysqan.
«Prezıdenttik jastar kadr rezervi týraly jańalyqtardan estigenimmen mende ótinim berý týraly oı bolǵan joq. Maǵan bul usynysty áriptesterim jasady. Onyń ústine memlekettik qyzmette óńirlerden bastap saty boıynsha tájirıbem bar bolatyn. Prezıdenttik jastar kadr rezerviniń jeńimpazy atanǵanyma árıne qýanyshty boldym. Meni taǵy bir qýantqany, konkýrs ashyq túrde ótti. Basynda baıqaýdan ótý úshin tamyr-tanys kerek degen pikir ustanǵandar da boldy. Al meniń qatysýshy retinde konkýrstyń ashyq ári ádil ótkenine kózim jetti. Sondaı-aq baıqaýdyń formaldy túrde emes, naqty nátıjege baǵyttalǵany aıqyn kórindi. Osyǵan baılanysty mende bir jaǵdaı boldy. Baıqaý shartyna sáıkes úmitkerler esse jazýy kerek. Meniń essem tehnıkalyq aqaýdyń saldarynan joıylyp ketken. Osy oraıda qabyldaý komıssııasy meniń kinámniń joǵyna kózderi jetken soń, maǵan qaıta tapsyrý múmkindigin berdi. Bul degenimiz adamı faktor, onyń ústine baıqaýdyń belgili talap-erejeleri bar. Qýanyshqa oraı, esse jazýdan jaqsy nátıje kórsetip, eń joǵary upaıǵa ıe boldym», - dedi ol.
Sondaı-aq, prezıdenttik jastar kadr rezerviniń jeńimpazy búgingi qyzmetine qatysty málimettermen bólisti.
«Qazirgi kásibim ınnovatsııalyq tehnologııa salasy. Bul salanyń ereksheligi sol - naqty zań nemese shek degen joq. Jalpy Qazaqstanda ózindik ósý, ózin-ózi damytý jaǵy aqsap tur. ıAǵnı qaı salada bolsyn jańa bir tehnologııany engizý, jańalyq alyp kelý ońaı emes. Bizde bári dástúrli túrde jasalynýy tıis degen jańsaq pikir bar. Túsinik basqasha. Osy jaǵy bizdiń jumystyń qıyndyǵy dep aıtýǵa bolady. Árıne kásibimizdiń ózindik ereksheligi men qyzyqty sátteri de bar. Aty aıtyp turǵandaı, ınnovatsııa, ol degenimiz jańa dúnıe oılap tabý, buryn bolmaǵan jańashyldyq engizý. ıAǵnı bizdiń ıdeıamyz júzege asyp, ınnovatsııa engizilse, biz qýanamyz. Odan soń basqa jańa jobalardy qýana qolǵa alasyń», - dedi І. Ospanov.
Odan bólek, ortalyq basshysy birneshe ret memlekettik qyzmetten túbegeıli ketkisi kelip, qaıta kelgenin jetkizdi.
«Iá, memlekettik qyzmetten túbegeıli ketkim kelgeni ras. Degenmen ýaqyt óte kele elge qyzmet etý salasyn tańdadym. Prezıdenttik jastar kadr rezervi jobasynyń arqasynda kóptegen zamandas, dostar taptym. Búginde biz bir-birimizben jaqyn aralasyp, jumys barysynda aqyl-keńesimizben bólisip otyramyz», - deıdi ol.
