Prezıdenttik saılaýǵa túsetin birinshi áıel kandıdat eńbek jolyn qalaı bastaǵan
QR Parlament Májilisiniń resmı saıtyna kórsetilgen aqparatqa sáıkes, Danııa Madıqyzy Espaeva 1961 jyly 5 naýryzda Aqtóbe oblysynyń Mártók aýdanyndaǵy Jaısań aýylynda dúnıege kelgen. 1982 jyly Almaty esep-nesıe texnıkýmyn bitirgen. Al 1993 jyly Qazaq memlekettik basqarý akademııasynyń ekonomıst mamandyǵy boıynsha dıplomyn aldy. Eńbek jolyn texnıkýmdy bitirgennen keıin bastaǵan.
1982 j. - KSRO Memlekettik bankiniń Aqtóbe oblystyq basqarmasynyń nesıelendirý bóliminiń ekonomısi, 1986-1987j.j. - osy bólimniń bas ekonomısi, 1988-1991j.j. - Promstroıbanktiń oblystyq basqarmasy aqsha aınalymy bóliminiń bas ekonomısi, 1992 j. - "Turan" saqtandyrý qoǵamynyń Aqtóbe oblystyq fılıalynyń bas býxgalteri, 1992-1995 j.j. - "Turan" SQ Aqtóbe oblystyq fılıaly dırektorynyń orynbasary, 1995-1997 j.j. - Qazaqstannyń Álem Banki Aqtóbe oblystyq fılıaly nesıe bóliminiń bas mamany, nesıelendirý bólimi bastyǵynyń orynbasary, atalǵan bólim bastyǵynyń mindetin atqarýshy, 1998 - 2005 j.j. - «BTA Bank» AQ dırektorynyń korporatıvtik bıznes jónindegi orynbasary, 2006 j.- 2014 j. qarashaǵa deıin - «BTA Bank» AQ Aqtóbe oblystyq fılıalynyń dırektory, 2014 j. qarashadan bastap - «Qazkommertsbank» AQ Aqtóbe oblystyq fılıalynyń dırektory, al 2016 jyldyń naýryz aıynan bastap QR Parlamenti Májilisiniń depýtaty qyzmetin atqaryp júr. Májilistiń bıýdjet jáne qarjy komıtetiniń quramyna kiredi.
Danııa Espaevanyń bank salasyndaǵy jalpy eńbek ótili 34 jyldy quraıdy. Sonyń 17 jylyn ol basshylyq qyzmette ótkizdi. Oblystyq máslıxatqa eki ret depýtat bolyp saılandy. "Atameken" UKP fılıalynyń basqarmasyna kiredi. Oblystyq ákimdiktiń janyndaǵy Áıelder jáne otbasy isteri jónindegi komıssııanyń quramynda 14 jyl bolǵan. Aqtóbe oblysynyń qoǵamdyq-saıası ómirine belsene aralasqany jáne aımaq ekonomıkasyn damytqany úshin 2011 jyly "Qurmet" ordenimen marapattalǵan. Qazaqstan Táýelsizdiginiń 20 jyldyǵy men 25 jyldyǵyna arnalǵan medaldary da bar. Budan bólek, Qazaqstannyń qarjy salasyn damytýǵa qosqan úlesi úshin "Úzdik qarjyger" qoǵamdyq medalimen marapattalǵan. Eki uly men eki nemeresi bar.
Aıta keteıik, búgin quryltaı delegattary jasyryn daýys berý arqyly alty úmitkerdiń bireýin tańdady. Daýys berý kezinde 190 delegattyń 49,5 protsenti depýtat Danııa Espaevanyń kandıdatýrasyn qoldady. Biraq kandıdattyń daýysy 50 protsentten asýy kerek. Osydan keıin prezıdıým músheleri keńesip, ekinshi týrdy ótkizbeý jóninde sheshim qabyldady. Sebebi D.Espaevanyń basymdyǵy aıqyn boldy. Delegattar atalǵan sheshimdi qoldady. Sóıtip, Danııa Espaeva partııanyń atynan prezıdent saılaýyna kandıdat retinde bekitildi.
"Jaqynda ortalyq keńesiniń plenýmynda prezıdenttikke úmitkerler máselesi talqylanǵan bolatyn. Azat Turlybekuly maǵan kandıdatýramdy shyǵarýǵa usynys jasady. Sol kezde "Saılaýǵa áıel adam qatyssa, qalaı bolady eken?" degen suraqtar da qoıyldy. Qazaq qoǵamynda áıelder óz ornyn bilýi kerek dep qarsy shyqqandar da boldy. Sonda men namystanyp kettim. Áıeldiń de bılikte otyra alatynyn dáleldep bereıinshi dedim. Sóıtip, prezıdenttik saılaýǵa qatysýǵa bel býdym", - deıdi Danııa Espaeva osy sheshimge qalaı kelgeni jóninde.
Onyń aıtýynsha, búginde QR Parlament Májilisinde depýtattardyń 30 protsenti - áıelder. "Aqjol" fraktsııasynda áıel depýtattardyń sany da az emes. "Osynyń ózi áıel adamdardyń bılikte otyra alatynyn kórsetip otyr. Menińshe, áıel bar jerde tártip bar", - dep atap kórsetti D.Espaeva.
