Prezıdentiń barlyq bastamasyn sessııa barysynda iske asyrýǵa kúsh-jigerimizdi salamyz – Senat tóraǵasy
ASTANA. KAZINFORM – Senat tóraǵasy Máýlen Áshimbaev Memleket basshysy Joldaýyndaǵy basym baǵyttar aıasynda atqarylatyn jumystarǵa túsinik berdi.
«Ekinshi qyrkúıekte Memleket basshysynyń qatysýymen VIII saılanǵan Parlamenttiń úshinshi sessııasy óz jumysyn bastady. Eń aldymen barshańyzdy sessııanyń ashylýymen quttyqtaımyn! Sessııanyń ashylýynda, qalyptasqan dástúr boıynsha, Prezıdentimiz Qazaqstan halqyna Joldaýyn jarııalady. Qasym-Jomart Kemeluly Toqaev elimizdiń saıası jáne áleýmettik-ekonomıkalyq damýyna qatysty 9 strategııalyq baǵytty aıqyndap berdi. Bul baǵyttardy iske asyrý aıasynda «bıýdjettik jáne áleýmettik pragmatızm» qaǵıdatyna erekshe kóńil bólinip otyr. Sondaı-aq, ınfraqurylymnyń negizgi róli, tsıfrlandyrý sııaqty qaǵıdattarǵa da basymdyq berildi. Kásipkerler úshin tıimdi sharttardy saqtaı otyryp, salyq rejımderin ońtaılandyrý jumystary júrgiziledi. Bank sektoryn ekonomıkaǵa kóbirek ınvestıtsııa salý úshin yntalandyrý sharalary da qabyldanady», - dedi M. Áshimbaev Senattyń jalpy otyrysynda.
Onyń aıtýynsha, Úkimet janyndaǵy Investıtsııalyq shtabtyń róli artyp, el ekonomıkasyna ınvestıtsııa tartýǵa jáne otandyq ónerkásipti qoldaýǵa baǵyttalǵan qosymsha sharalar qabyldanady. Orta bıznes jańa jeńildikter men artyqshylyqtarǵa ıe bolady. Sol arqyly 2029 jylǵa qaraı orta bıznestiń ekonomıkadaǵy úlesin 15 paıyzǵa deıin jetkizý úshin qolaıly jaǵdaı jasalady. Agroónerkásiptik keshenge ınvestıtsııa, atap aıtqanda, kommertsııalyq bankterdiń qarajatyn tartý basymdyqtardyń biri retinde belgilendi. Aýyl turǵyndary óndirgen ónimdi qaıta óńdeý jáne ótkizý ınfraqurylymy qurylady.
«Memleket basshysy energetıka sektoryndaǵy jáne kólik salasyndaǵy ınfraqurylym problemalaryn sheshýdiń naqty joldaryn da aıqyndap berdi. Prezıdentimiz 6 qazanda AES salý máselesi boıynsha jalpyulttyq referendým ótkizý týraly Jarlyqqa qol qoıdy. Sol arqyly atalǵan mańyzdy másele boıynsha sheshimdi Qazaqstan halqy qabyldaıdy. Sondaı-aq Joldaýda 2025 jyl bizdiń qoǵamda eńbekqorlyq pen kásipqoılyq ıdeıasyn dáripteýge yqpal etetin Jumysshy mamandyqtar jyly dep jarııalandy. Memlekettik basqarý salasynda bıýdjet aqshasyn tıimdi paıdalanýǵa, shyǵystardy shekteýge jáne qatań baqylaýǵa arnalǵan sharalar qabyldanady. Aldaǵy ýaqytta aýdandar men oblystyq mańyzy bar qalalardyń ákimderi tikeleı saılanatyn bolady», - dedi Senat tóraǵasy, Ult densaýlyǵyn nyǵaıtý, azamattardy áleýmettik qoldaý júıesin qaıta jańǵyrtý, bilim berý sapasyn arttyrý boıynsha da naqty mindetter aıqyndaldy.
«Ekologııalyq jaǵdaıdy jaqsartý jáne qorshaǵan ortany qorǵaýdy nasıhattaý máseleleri de nazardan tys qalǵan joq. Jalpy, Joldaýda júktelgen mindetter men maqsattardy iske asyrý úshin tıisti zańnamalyq aktiler ázirlenip, qabyldanady. Palata olardyń ýaqtyly qaralýyn jáne maquldanýyn qamtamasyz etedi. Bul jumystardy biz Májilis pen Úkimettegi áriptesterimizben jáne sarapshylarmen birlesip júrgizemiz. Azamattarymyzdyń ómir súrý deńgeıin odan ári arttyrýǵa jáne Qazaqstannyń ornyqty damýyna arnalǵan Prezıdentimizdiń barlyq bastamasyn sessııa barysynda birlesip iske asyrýǵa bar kúsh-jigerimizdi jumsaýymyz qajet. Osy baǵyttaǵy jumystarymyz nátıjeli ári sátti bolady dep senemin», - dedi Máýlen Áshimbaev.
