Prezıdent Jasandy ıntellektini damytý keńesiniń alǵashqy otyrysyn ashty
ASTANA. KAZINFORM — Elordada Memleket basshysynyń tóraǵalyǵymen Jasandy ıntellektini damytý jónindegi keńestiń alǵashqy otyrysy bastaldy.
Bul keńes JI, ǵylymı zertteý men tsıfrlyq tehnologııa salasynda Qazaqstannyń Ortalyq Azııadaǵy jetekshi oıynshy retinde strategııalyq damýynyń mańyzdy qadamy bolmaq.
Jasandy ıntellektini damytý jónindegi keńes Prezıdent Jarlyǵymen qurylǵan jáne ol — eldegi JI damytýdyń strategııasyn qalyptastyratyn, tehnologııalardy ekonomıkanyń negizgi salalary men memlekettik basqarýǵa engizýdi súıemeldeıtin, sondaı-aq salalyq baǵdarlamalar men strategııalyq qujattarǵa usynystar ázirleıtin keńesshi-konsýltatıvtik organ.
— Eń aldymen Astanaǵa arnaıy kelgen keńes múshelerine shynaıy rızashylyǵymdy bildiremin. Búgingi basqosý «Bilim berý salasyndaǵy jasandy ıntellekt: mol múmkindikter jáne syn-qaterler» degen taqyryppen ótedi. Bilim-ǵylym salasy strategııalyq sala. Sondyqtan eń aldymen osy baǵytta pikir almasyp, oı bólisemiz, — dedi Qasym-Jomart Toqaev otyrystyń ashylýynda.
Birinshi otyrysqa Qazaqstan Úkimetiniń ókilderi, onyń ishinde Premer-mınıstr men salalyq mınıstrler, sondaı-aq álemniń jetekshi ýnıversıtetteri men kompanııalarynan halyqaralyq sarapshylar men ǵalymdar qatysyp otyr. Olardyń qatarynda BAÁ, AQSh jáne Qytaı mamandary bar.
Keńeste adamı kapıtaldy damytý jáne bilim berý salasynda jasandy ıntellektini paıdalaný máseleleri qarastyrylady. JI-diń oqý protsesindegi róline, mamandardy daıarlaýǵa jáne ekonomıkanyń túrli salalaryna engizilýine erekshe nazar aýdarylady.
Sonymen birge, otyrys aıasynda Memleket basshysy tsıfrlyq sheshimder kórmesin aralady.
Aıta keteıik, Memleket basshysy bıylǵy Joldaýynda jasandy ıntellektti barlyq salaǵa engizý bastamasyn kóterdi.
Keńes quramyna Prezıdent Qasym-Jomart Toqaev, Premer-mınıstr Oljas Bektenov, Prezıdenti ákimshiliginiń basshysy Aıbek Dádebaı, Ulttyq qaýipsizdik komıtetiniń tóraǵasy Ermek Saǵymbaev, «Samuryq-Qazyna» ulttyq ál-aýqat qory» AQ basqarma tóraǵasy Nurlan Jaqypov, Ǵylym jáne joǵary bilim mınıstri Saıasat Nurbek engen.
Sonymen birge, keńes quramynda halyqaralyq sarapshylar – BAÁ Jasandy ıntellekt, tsıfrlyq ekonomıka jáne qashyqtan jumys isteý isteri jónindegi memlekettik mınıstri Omar ál-Olama, Sinovation Ventures bas dırektory Kaı-Fý Lı, Kornell ýnıversıtetiniń qurmetti professory, Shanhaı ýnıversıteti janyndaǵy Kompıýterlik ǵylymdar ortalyǵynyń dırektory Djon Hopkroft, fýtýrolog, geoekonomıkalyq strateg jáne Berklı ýnıversıtetiniń Haas bıznes-mektebiniń oqytýshysy Olaf Dj. Grot, BUU «JI – ıgilik úshin» bastamasy atqarýshy keńesiniń tóraıymy – Ebtesam Ál-Mazrýı, San-Dıegodaǵy Kalıfornııa ýnıversıtetiniń rektory Pradıp Khosla, Oxford Insights kompanııasynyń bas dırektory – Rıchard Stırlıng bar.
Jýyrda Jaslan Mádıev QR Premer-mınıstriniń orynbasary — Jasandy ıntellekt jáne tsıfrlyq damý mınıstri bolyp taǵaıyndaldy.