Opera ánshisi Marııa Mýdrıak memlekettik marapatqa ıe boldy
ASTANA. KAZINFORM - Qazaqstan Respýblıkasynyń Mádenıet jáne aqparat mınıstri Aıda Balaeva Italııaǵa issapary barysynda, opera ánshisi Marııa Mýdrıakqa «Qazaqstannyń eńbek sińirgen qaıratkeri» memlekettik marapatyn tabystady.
QR Mádenıet jáne aqparat mınıstrligi baspasóz qyzmetiniń habarlaýynsha, Djýzeppe Verdı atyndaǵy Mılan konservatorııasynyń túlegi Marııa Mýdrıak búginde álemniń jetekshi opera sahnalarynda óner kórsetip júr. Ol halyqaralyq mamandardyń baǵalaýy boıynsha, álemniń úzdik on sopranosynyń qataryna engen.
«Men úshin óz Otanym – Qazaqstannyń marapatqa laıyq sanaǵany – úlken qurmet. Prezıdentimizge sheksiz alǵys aıtamyn. Bul – meniń ómirimdegi mańyzdy oqıǵalardyń biri. Men nebári 9 jasymda, Italııaǵa oqýǵa attanarda belgili qıyndyqtar boldy. Sol kezde Qasym-Jomart Kemeluly Syrtqy ister mınıstri qyzmetin atqaryp júrip, bul máseleniń sheshimin taýyp bergen edi», – dedi Marııa marapattaý rásiminde.
Bıyl opera ánshisiniń shyǵarmashylyǵy men kásibı mansabyna 28 jyl toldy. Marııa Qazaqstandy álemniń eń iri opera sahnalarynda zor maqtanyshpen tanystyryp júrgenin jáne aldaǵy ýaqytta da el ıgiligi úshin aıanbaı qyzmet etetinin aıtty.
QR Mádenıet jáne aqparat mınıstri Aıda Balaeva Rımge sapary barysynda ıtalııalyq mádenı uıymdardyń ókilderimen de kezdesti.
Mınıstr Qazaqstan men Italııa arasyndaǵy baılanys barlyq baǵytta damyp kele jatqanyn jáne mádenı yntymaqtastyq eki el arasyndaǵy qarym-qatynastyń mańyzdy bóligine aınalǵanyn atap ótti.
«Qazir eki el arasyndaǵy mádenı baılanystardyń qarqyndy damyp kele jatqany baıqalady. Bul úrdis ózara qurmetti kúsheıtip, ulttyq dástúrlerge degen qyzyǵýshylyqty arttyrady. Memleketterimizdiń Prezıdentteri atap ótkendeı, bizdiń ortaq mindetimiz – mádenıet salasyndaǵy baılanysty túrli baǵytta tereńdetý. Biz ıtalııalyqtarǵa qazaq mádenıetin jaqyn tanystyrý maqsatynda birneshe is-shara ótkizýdi josparlap otyrmyz. Men mınıstr retinde ózara yntymaqtastyqtyń ári qaraı jemisti jalǵasýyna erekshe mán beremin», – dedi Aıda Balaeva.
Mınıstrdiń aıtýynsha, 24–26 qarasha aralyǵynda Italııada «Qazaq kınosynyń kúnderi» ótedi. Onda otandyq kınogerlerdiń jańa týyndylary men klassıkalyq fılmderi kórsetiledi. Italııalyq áriptestermen ótken kezdesý barysynda kreatıvti ındýstrııa, zergerlik óner, kıno jáne anımatsııa salalaryndaǵy yntymaqtastyq perspektıvalary talqylandy. Birlesken jumystyń mańyzdy baǵyttarynyń biri retinde sáýlet ónerine de erekshe nazar aýdaryldy.
Sonymen qatar Aıda Balaeva 1939 jyly qurylǵan Eýropadaǵy kóne mekemelerdiń biri – Ortalyq restavratsııa ınstıtýtyna bardy. Bul ınstıtýt – Italııadaǵy mádenı murany saqtaý jáne qalpyna keltirý salasyndaǵy jetekshi ǵylymı-zertteý ortalyqtarynyń biri. Munda óner týyndylaryn, sáýlet eskertkishteri men arheologııalyq nysandardy qaıta qalpyna keltirýdiń zamanaýı ádistemeleri ázirlenedi.
Aıta ketsek, bıyl Italııanyń Restavratsııa ınstıtýty men Qazaqstan Respýblıkasynyń Ulttyq mýzeıi arasynda ózara túsinistik týraly memorandýmǵa qol qoıyldy.
Osyǵan deıin Astanada Italııa mádenı ortalyǵy ashylǵan bolatyn.