Prezıdent janyndaǵy Jastar saıasaty jónindegi keńestiń otyrysy ótti

NUR-SULTAN. QazAqparat - Qazaqstan Respýblıkasynyń Prezıdenti janyndaǵy Jastar saıasaty jónindegi keńestiń kezekti otyrysy ótti, dep habarlaıdy Aqordanyń baspasóz qyzmeti.

Otyrys barysynda Memlekettik keńesshi Erlan Qarın Keńeste mańyzdy qujattardyń biri – Jastar saıasatynyń jańa tujyrymdamasy ázirlenetinin atap ótti. Tujyrymdama jastar saıasaty baǵytyndaǵy negizgi qujatqa aınalady.

Tujyrymdamany ázirleý kezinde jyl saıynǵy «Jastar» ulttyq baıandamasynyń taldamalyq derekteri, táýelsiz áleýmettik zertteýler, saraptamalyq jáne qoǵamdyq pikirtalastar barysynda qalyptasqan usynystar men usynymdar paıdalanylady.

Sonymen qatar Jastar saıasaty jónindegi keńeste jastar arasynda sıntetıkalyq esirtkiniń taralýyna qarsy is-qımyl máseleleri talqylandy.

Memleket basshysy óziniń ótken jylǵy «Halyq birligi jáne júıeli reformalar – el órkendeýiniń berik negizi» atty Qazaqstan halqyna Joldaýynda «Esirtkiniń, onyń ishinde sıntetıkalyq esirtkiniń taralýy bolashaq urpaqtyń tamyryna balta shabady» dep atap ótti.

Talqylaýǵa Keńes músheleri, sondaı-aq Іshki ister mınıstri Marat Ahmetjanov, Densaýlyq saqtaý mınıstri Ajar Ǵınııat, «Sol» derekti fılminiń rejısseri jáne prodıýseri Rınat Balǵabaev qatysyp, sıntetıkalyq esirtkiniń taralýyna qarsy kúres pen oǵan qarsy is-qımyl, nashaqorlyqtyń aldyn alý jáne emdeý máseleleri boıynsha júrgizilip jatqan jumystar týraly aıtyp berdi.

Sondaı-aq Keńes otyrysyna salalyq ÚEU ókilderi men sarapshylar belsendi qatysyp, nashaqorlyqtyń aldyn alý boıynsha óz usynystaryn aıtty.

Keńes otyrysynyń qorytyndysy boıynsha memlekettik organdar úshin aqparattyq-profılaktıkalyq jumysqa jurtshylyqty belsendi tarta otyryp júzege asyrylatyn naqty usynymdar ázirlendi.

Foto: akorda.kz